Достастық дәнекері

Сыртқы істер министрлері Қазақстан Президентінің ТМД-ны жаңғырту жөніндегі бастамасын талқылады Кеше Мәскеуде Қазақстан Республикасының Сыртқы істер министрі Ерлан Ыдырысов ТМД Сыртқы істер министрлері кеңесінің (СІМК) мәжілісіне қатысты. Достастыққа мүше елдер сыртқы саясат ведомстволарының басшылары ТМД аясындағы өзара іс-қимылдың ағымдағы жағдайы мен перс­пективалары туралы пікір алмасып, алдағы күзде Бішкекте өткізілуі жоспарланған мемлекет басшылары деңгейіндегі кездесуге дайындық мәселелерін талқылады. «Біз үшін талқылаудың негізгі тақырыбы Достастықтың 25 жыл­дығын лайықты қарсы алу болды. ТМД-ның 1991 жылдың 21 жел­тоқсанында тәуелсіз мемлекеттер басшыларының Алматы декла­рациясында тағайындалғаны белгілі», – деп атап көрсетті өзінің сөзінде Е.Ыдырысов. Кездесуге қатысушылар, сон­дай-ақ, халықаралық және өңір­лік күн тәртібіндегі көкейкесті мәсе­лелер бойынша пікір алмас­ты. Осы орайда, мәжіліс шеңберінде ТМД-ға тең төраға үш мемлекеттің сыртқы істер министрлері Таулы Қарабақ жанжалы аймағындағы жағдайдың ушығып кетуіне байланысты бірлескен мәлімдеме қабылдады. Онда ЕҚЫҰ-ның Минск тобы тарапынан айқындалған жанжалды бейбіт реттеу негізіндегі қағидаттарды белсенділендіру қажеттілігі атап көрсетіледі. Ұйымның бұрынғы, іс басындағы және келесі төрағалары енетін тең төрағалар қазіргі кезде сәйкесінше Қазақстан, Қырғызстан және Ресей болып табылады. «Біздің кездесуіміз бағытталған келесі маңызды мәселе Қазақстан басшысы Нұрсұлтан Назарбаевтың ТМД мен оның құрылымдарының қызметін жаңғырту және тиім­ділігін арттыру бойынша бастама­сы бол­ды», – деп хабарлады Е.Ыды­ры­сов. Оның сөзіне қара­ғанда, «аталған мәселе бойынша консен­сустық сұлба айқындалып келеді». «Бішкектегі ТМД саммитіне дейін біз ұйымымыз үшін үлкен маңызға ие тиісті шешім дайындаймыз ғой деген үміттеміз. Мақсат – Достастықтың жаңа пішінге ие болып, заманауи, жаңғыртылған және жаңа күн талабына жауап бере алатындай болуына қол жеткізуге ұмтылу», – деп қорытты сөзін қазақстандық министр. Сондай-ақ, СІМК қылмыстық сот жүргізу, денсаулық сақтау және мәдени ынтымақтастық салалары бойынша бірқатар бағ­дар­ламалық және тұжырымдамалық құжат­тардың жобаларын мақұл­дады. Олардың арасында «ТМД-ға қатысушы мемлекеттер халқының денсаулығы» стратегиясы, Онко­ло­гиялық ауруларға қарсы іс-қимыл таныту саласындағы ынты­мақтастық тұжырымдамасы, ТМД-ға қатысушы елдердің «ART EXPO» халықаралық көрмесі туралы ереже бар. Министрлер, сон­дай-ақ ТМД-ға қатысушы мем­лекеттердің бірқатар ұйымдарына қорғаныс, жастармен жұмыс және жастар кәсіпкерлігін дамыту салаларындағы базалық ұйымдар мәртебесін беру мүмкіндігі мәсе­лелерін қарастырды. ТМД СІМК алаңдарында Е.Ыдырысов Ресей Сыртқы істер министрі С.Лавровпен жұмыс кездесуін өткізді. Онда екіжақты қарым-қатынастың көкейкесті мәселелері мен Ресеймен өңірлік және жаһандық ауқымдағы өзара іс-қимыл мәселелері талқыланды. Саулебек БІРЖАН.