Айдын Айымбетов Ақтөбеге келді

Облысқа екі күндік сапармен келген ғарышкер, Халық қаһарманы Айдын Айымбетов Т.Бигельдинов атындағы әуе қарулы күштері әскери институтында, физика-математика бағытындағы Назарбаев зияткерлік мектебінде болып, оқып жатқан жастармен бірнеше кездесу өткізді. Сонымен бірге, ұшқыш-ғарышкер Алға ауданының жас­тарымен де  кездесті. Назарбаев зияткерлік мектебінде құрметті қонаққа оқу бөлмелеріне экскурсия ұйымдастырылды, оны шығар­машылық және ғылыми-зерттеу жұмыстар көрмесімен таныстырды. Ұшқыш-ғарышкерді сегізінші сынып оқушысы Ләззат Данаева әзірлеген электромагнитті толқын­ның көмегімен ғарыш аппараттарын ұшыру жөніндегі жобалар қы­зықтырды. Мектеп оқушысының айтуын­ша, мұндай технологиялардың бола­шағы зор, электромагнитті тол­қындарға қатысты жобалар эконо­микалық тұрғыдан ғана тиімді емес, сонымен қатар, экологиялық жағынан қауіпсіз. Назарбаев зияткерлік мек­тебі оқушыларының ғылыми жобаларымен танысқан Айдын Айымбетов олар­дың білімі мен оқуға деген құл­шы­нысына ризашылығын білдірді. – Ғарыш саласының мүмкіндігі зор. Соңғы уақытта жер орбитасы маңында түрлі тәжірибелер жүргізіп қана қоймай, таяудағы 15-20 жылда айға ғарыштық сапарды жандандыру, планеталар арасында ұшу секілді мәселелер көтеріле бастады, – деп атап өтті қазақстандық жастардың таланты мен білімі Қазақстандағы космонавтиканың дамуының негізгі құрамдасы болуы керектігін жеткізген Айдын Айымбетов. Бұдан кейін Айдын Айымбетов адам баласының ғарышты бағындыруына 55 жыл толуына орай ұйымдастырылған ғарыш апталығының ашылу салтанатына қатысты. Шара Т.Ахтанов атындағы облыстық драма театрында өтті. Қазақ ғарышкерінің пікірінше, мұндай шаралар заманауи космонавтиканың жетістіктерін паш ету үшін, демек, осы саланың одан әрі дамуы үшін қажет. Сатыбалды СӘУІРБАЙ, «Егемен Қазақстан». Ақтөбе облысы.