«Егеменге» жаңа басшы тағайындалды

«Егемен Қазақстан» газеті басшылығында өзгеріс болатынын жұртшылықтың біліп отырғаны рас. Қазақтың бас газетіне кім басшы болар екен деген ойдың талайларды толғандырып жүргені де жасырын емес. Кеше сол түйін тарқатылды. Инвестициялар және даму вице-министрі Сәкен Сәр­сенов «Егемен Қазақстан» рес­пуб­ликалық газеті» акционерлік қоғамына келіп, ұзақ жылдар бойы ұжымды абыроймен басқарған, Мәжіліс депутаты болып сайлануына байланысты еңбек шарты үзілген Сауытбек Абдрахмановқа жемісті қызметі үшін министрдің бұйрығымен алғыс жарияланғанын жеткізді. Елбасының ұйғарымымен, құрылтайшының шешімімен басылымның вице-президенті Еркін Қы­дырдың ұжымның жаңа басшысы – АҚ басқармасының төрағасы болып тағайындалғаны айтылды. Еркін Сағындықұлы Қыдыр «Егемен Қазақстан» газеті редакциясында өсіп, қалыптасқан білікті де белгілі журналист, білімді басшы. Ол газетте 26 жыл бойы табан аудармай қызмет істеп, соның 20 жылында бас редактордың орынбасары, вице-президент қызметтерін атқарған. Бұқаралық ақпарат құралдарына арналған Пре­зи­дент сыйлығын алғашқы болып алған журналистердің бірі ретінде оның қаламынан тәуел­сіз еліміздің аяғынан тік тұруына үлес қосқан талай өткір мақалалар мен терең пуб­ли­цис­тикалық туындылар жарық көріп келді. «Егемен Қазақстан» басы­лы­­мын 16 жыл бойы басқарған Сауытбек Абдрахманов өзінің сөзінде редак­ция ұжымына ұзақ уақыт қатар­ласа, қанаттаса қызмет еткен бірлескен еңбек үшін алғы­сын айтып, газеттен қол үз­бей­тінін, Мәжілістің Әлеумет­тік-мәдени даму коми­тетінде де бас­пасөзбен байланыс жағына жауапты болып бекі­тіл­генін атап өтті. Сонымен қатар, ол өзінің ұзақ жылдар бойғы қызметтік, шы­ғар­машылық, отба­сылық өмірі­не куә болған ұжым­мен қимай қоштасатынын айтты. Қолы­нан қаламын тастамай, газетке енді автор ретінде қаты­сып тұ­ратынын да жеткізді. Шын жү­ректен шық­қан осынау жан тол­қытарлық сөздерді әріп­тес­тері тебірене тыңдады. Шығып сөйлеген ұжым мүшелері Сауытбек Абдрах­мановты білімді бас­шы, білікті тұлға, парасатты азамат ретінде жүрек төрінде сақ­тай­тындарын риясыз пейілден айтты. «Егемен-ақпарат».