12 Сәуір, 2016

Қондырғыларды өзі ойлап тапты

267 рет
көрсетілді
1 мин
оқу үшін
14Кәсіпкерлік, индустриялық-инно­вациялық даму және туризм бас­қармасында жаңаша ізденісі, тың идея­сы бар азаматтарға жұмысын аяғына жеткізу үшін қайтарымсыз грант бөлінеді. Сарыағаштық ұста Нұржан Қарсыбаев – ағаш, темірден түйін түйе­тіндігінен бір бөлек, ауыр жұмысты оңайлататын қондырғылардың технологиясын ойлап тапқан өнертапқыш. Қайтарымсыз қаржы Нұрекенің өзі ойып, өзі жонып шығаратын қон­дырғыларын өндірісте қолдануына мүмкіндік берді. Енді ол баяғыдағы шеберлердей таңертеңнен кешке дейін ағашты жоңқалап шауып, кескімен бедерлеп ойып отырмайды. Темір қыр­қатын станокты астау оятын қон­­дырғыға айналдырған шебердің қолын­дағы ағаш әп-сәтте түрлі бұйым­дарға айналып шыға келеді. Нұржан Қарсыбаев Шымкенттегі Әбілхан Қастеев атындағы өнер кол­леджін­де білім алған. Шағын шеберханасында домбыра, қобыздан бөлек, ер де шабылады, торсық, кесе де жасалады. Өнертапқыш Қарсыбаевтың бір алаңдайтыны, робот сияқты берілген тапсырманы мүлтіксіз орындайтын қондырғылар түбінде ұлттық өнерді ұмыттырып жібере ме дейді. Сондықтан, шәкірттеріне кей­бір бұйымдарды өзі қолымен жасап көрсетеді. Білгенін үйретеді. Әдетте, ұлттық нақыштағы қазақ кәде­сыйларының дені Қытайда жасалатын. Қарсыбаевтың қондырғылары Қазақстан нарығын өзі қыздыратын болады. Жұмыс көп. Сұраныс үлкен. Шебер­лер қатары көбейіп келеді. Бақтияр ТАЙЖАН, «Егемен Қазақстан». Оңтүстік Қазақстан облысы.