12 Сәуір, 2016

Мекке мерекесі

268 рет
көрсетілді
2 мин
оқу үшін
мекке 3Ұлттық музейде «Мәскеу ақша сарайының күміс маркаларындағы Мекке» атты көрме өтті. «Мәскеу ақша сарайы ұсынып отырған көрме эксклюзивті көрме болып саналады. Қасиетті Меккеге ғана емес, жалпы Ислам діні мәдениетіне жасалған үлкен құрметтің белгісі ретіндегі топ­таманы жасау үшін 3 жыл уа­қыт қажет болған. Ондағы мар­калардың тура қырық санына сәйкестендірілуі кездейсоқ емес. Ардақты пайғамбарымызға 40 жасында Алладан уахи келген. Сонымен қатар, 40 саны өзге діндерде де қасиетті болып саналады. Ережеп айы басталғанда осы көрменің Ұлттық музейде өтіп жатқанына қуаныштымыз, – деді көрменің ашылу салтанатында топтамадағы маркалар ерекшелігіне тоқталған Ұлттық музейдің директоры Дархан Мыңбай. Мәдениет және спорт ми­нис­трлігінің жауапты хатшысы Қуатжан Уәлиев күміс мар­калар шектеулі тиражбен шығарылғанын, сондықтан да аз уақыт ішінде антиквариатқа айналғанын алға тарта келіп, құнды жәдігерлер көрмесі алғаш рет 2013 жылы Татарстанда өткенін және бұл көркемдігі жағынан әлемде баламасы жоқ бұйымдардың ұсы­нылымы екенін айтты. Ал, «ВТ» компаниясының директоры Владимир Прусаков осынау маңызды жобаны Ұлттық музейде өткізуге мұрындық болған ұйымдастырушыларға алғыс білдірді. Сонымен қатар, маркалар топтамасын жасау идеясы жайында әңгімелеп берді. Айта кету керек, «Күміспен күптелген Мекке» атты маркалар топтамасын жасау идеясы 2006 жылы «Алтын және Күміс Құрандар» жобасын жалғастыру әрі оны дамыту ниетінде туса, 2013 жылдан бері түрлі дүниежүзілік, халықаралық көрмелерге қатысып келе жатқаны өз алдына бөлек тарих. Сайып келгенде, бұлар ғасырлар артефакты болып табылады. Бұл жұмысқа ғалымдардан бастап, сарапшылар, технологтар, инженерлер, дизайнерлер, мүсіншілер мен суретшілер тартылған. Қаршыға КҮЛЕН.