Ғылым күніне арналған форум

Қазақ ғылымының бүгінгі жеткен биігі мен алдағы бел-белесіне арналған «Ғылым және бизнес» халықаралық форумы Алматы қаласында Ғылым күніне орайлас­тырылып өткізілді. Бұл іс-шараға көрнекті ғалым академиктер, Ұлттық ғылыми кеңестің мүшелері, шетелдік сарапшылар, жоғары оқу орын­дарының жетекшілері мен ғылыми қызметкерлері қатысты. Алқалы жиында Білім және ғылым министрі Ерлан Сағадиев сөз алып, тарихымыздағы айтулы кезең – Қазақстан Республикасы Тәуелсіздігінің 25 жылдығы аталып жатқан тұстағы кәсіби мереке – Ғылыми қызметкерлер күнімен қатысушыларды құттықтай келіп, «Қазіргі кезде әлемде ғылым мен жаңа технологияларды дамыту өзекті тақырыптардың бірі. Ғылыми әлеует, ғылыми техникалық ресурстар көбінесе әр елдің әлемдік қауымдастықтағы алатын орнын анықтайды, оның әлеуметтік-саяси экономика­лық мәселелерін тиімді шешуге мүмкіндік береді» дей келіп, отандық ғылымның дамуы жайлы ой байламдарын ортаға салды. Сол секілді, форумда Ұлттық ғылым академиясының президенті Мұрат Жұрынов өндірісті ғылыми тұрғыдан сүйемелдеу қажеттілігіне тоқталды. Ал шетелдік сарапшы, Корея ғылыми-техникалық ақпарат институтының өкілі Чал Су Лим Қазақстандағы ғылыми-техникалық ақпарат жүйесін Оң­түстік Кореяның тәжірибесін пайдалана отырып жетілдіру мүмкіндіктері бойынша жасаған баяндамасы жұртшылықтың көңілінен шықты. Форум аясында ғылыми-тех­никалық ақпарат жүйесін дамыту, басқа да мәселелер қозғалып, Тәуелсіздіктің 25 жылдық мерейтойына байланысты кітап көрмесі ұйымдастырылды.  «Егемен-ақпарат».