Келелі кеңестің берері көп

Елбасының тапсырмасына орай елімізде қылмысқа қарсы күрес күннен күнге қарқын алып келеді. Бұл міндетті сапалы орындау үшін қудалау органдарының қызметіне ай­тар­лықтай жаңалықтар да еніп жатыр. Ал мұндай игі өзге­рістердің бәрі қылмыспен күресте оң нәтижесін беретіні сөзсіз. Соның бірі ретінде айтар болсақ, кеше Астана қаласы ІІД Консультативтік кеңес органының алғашқы отырысы өтті. Консультативтік кеңес орга­нының алғашқы отырысын Астана қаласы Ішкі істер департаменті бастығы полиция генерал-майо­ры Амантай Әубәкіров ашты. Департамент басшысы өз сөзінде Консультативтік кеңес органы Мемлекет басшысы Нұрсұлтан Назарбаевтың «100 нақты қадам» – Ұлт Жоспарында көзделген талаптарын жүзеге асыру мақсатында құрылғандығын және органның басты мақсаты Қазақстан Республикасы азаматтарының құқықтары мен бостандықтарын қорғау, полиция қызметін әділ әрі ашық ету, азаматтық қоғам мен құқық қорғау органдарының арасында өзара байланыс орнату болып табылатындығын атап өтті. Консультативтік кеңес ор­га­нының құрамына Парламент Мә­жілісінің депутаты Абай Тас­болатов, қалалық мәслихаттың депутаттары Жанат Нұрпейісов, Зәуре Жүсіпова, «Ұлттық-ғылыми медициналық орталығы» АҚ бас директоры Абай Байгенжин, «Цес­набанк» АҚ директорлар кеңесінің мүшесі Николай Мещеряков, «Ұлттық-ғылыми каридохирургия орталығы» АҚ директорлар кеңесінің төрағасы Қадыр Омаров және т.б. енді. Аталмыш кеңестің негізгі міндеттері – ішкі істер органдарына олардың қызметінің ай­қындылығын қамтамасыз етуге ықпал жасау, халықтың мем­лекеттің ішкі істер органдарына сенімін арттыру, үкіметтік емес ұйым­дардың құқықтық мемлекетті ны­ғайтудағы рөлін одан әрі арттыру, ішкі істер органдарының қызметіне консультативтік, әдіс­темелік және өзге де қолдаулар көр­сету, ішкі істер органдарының қыз­меткерлерін әлеуметтік мәсе­лелерін шешуге ықпал ету болып табылады. Ал аталған Кон­сультативтік кеңес органының төр­ағасы болып «Ұлттық ғылыми меди­циналық орталығы» АҚ бас ди­ректоры Абай Байгенжин сайланды. Александр ТАСБОЛАТОВ, «Егемен Қазақстан».