Батыс Қазақстанда 330 млрд. теңгенің 41 жобасы жүзеге асырылуда

ОРАЛ. 12 сәуір. Батыс Қазақстан облысында жалпы сомасы 330 млрд. теңгені құрайтын 41 жоба жүзеге асырылуда. Бүгін «Мемлекет басшысының 5 институттық реформасын жүзеге асыру бойынша 100 нақты қадам» Ұлт жоспарын жүзеге асыру мәселелеріне арналған брифингте аталған өңірдің басшысы Алтай Көлгінов осылай деп мәлім етті. Бұл туралы zhaikpress.kz-ке сілтеме жасаған egemen.kz тілшісі хабарлады. «Бүгінгі күннің негізгі міндеттерінің бірі жаңа өндіріс орындарын құрып, жұмыс істеп тұрғандарын кеңейту болып отыр. Индустрияландыру картасы аясындағы өзектендірілуді еске алғанда облыста сомасы 330 млрд. теңгені құрайтын 41 жоба жүзеге асырылуда. Сондай-ақ, 2242 жұмыс орны құрылатынын атап өткен жөн», – деді облыс әкімі. Алтай Көлгіновтің келтірген деректеріне сәйкес, индустрияландырудың алғашқы 5 жылдығында 258 млрд. теңгеге 31 инвестициялық жоба жүзеге асырылып, 1828 жұмыс орны құрылған. 2015 жылдың қорытындысында өнеркәсіптің жалпы көлеміндегі индустрияландыру картасы жобаларының үлесі 30 пайызды, ал өңдеу өнеркәсібіндегі үлесі 14 пайызды құраған. Темір Құсайын. Дерек: zhaikpress.kz. Фото: bko.gov.kz.