Жолаушылар автобусы құзға құлап, 25 адам мерт болды

АСТАНА. 18 сәуір. Үндістанның солтүстік-батысында жолаушылар автобусы құзға құлап, 25 адам мерт болды. Бұл туралы ТАСС ақпарат агенттігіне сілтеме жасаған egemen.kz тілшісі хабарлады. Автобус ішінде 40 адам болған. The Times of India басылымы олардың опера әншілері әрі Девгар аймағындағы концерттен кейін Раджастан штатына қарай бағыт алып, кетіп бара жатқанын хабарлады. Зардап шеккендер ауруханаға жеткізілді. Дәрігерлер 10 науқастың жағдайы тым ауыр екенін мәлімдеді. Алдын ала болжам бойынша көлік жүргізушісі бұрылыста рульге ие бола алмаған. Қазір оқиға орнында тергеу амалдары жүріп жатыр. Айта кетейік, Үндістан әлемдегі жол апаты жиі болатын елдердің арасында бірінші орында тұр. Ресми мәліметтер бойынша, бұл мемлекетте жылына 150 мыңнан астам адам көлік апатынан қаза табады. Аян Әбдуәли. Дерек: ТАСС. Фото: 24.kz.