Әскери қызметші қыздар КамАЗ жүргізеді

Жақында еліміз бойынша әйел әскери қызметшілерге КамАЗ автомобильді техникасын жүргізуді үйрету бойынша сабақтар өткізіле бастады. Оның алғашқы сабағы 83205 әскери бөлімінің базасында өтті. Сабақтар жауынгерлік даярлық жоспарына сәйкес айына бір рет практикалық сабақтарға ауысып отырады. Қарулы Күштерде осы сабақтарға жауапты әскерилердің бірі 83205 ә/б командирі полковник Айдар Абдрахманның айтуынша, әрбір әскери қызметші жынысына қарамастан, жауынгерлік техниканы жүргізе алуы тиіс. Әйел әскери қызметшілер ерлермен қатар барлық практикалық са­бақтарды орындайды. Бұл соғыс кезінде әйелдердің техниканы жүргізуі үшін қажет. Бүгінде әйел әскери қызмет­шілердің жауынгерлік даярлығына жақсы баға берілуде.  Олар ерлермен бірге жауынгерлік даярлық бағ­дар­ламасын меңгеруде. Нәзік жан­дарға КамАЗ сияқты ауыр тех­никаға  отырып, оның ауыр рө­лін ұстау оңай емес. Дегенмен, 83205 әскери бөлімінің арулары өзде­рінің практикалық машықтары мен жауынгерлік даярлықтарын көрсетті. – Мен Қарулы Күштерде 13 жылдан бері қызмет атқарып келе­мін. Күн сайын бізде жауынгерлік әзірлікті арттыру бойынша са­бақтар өткізіледі. Жаңа жылдан бастап біз КамАЗ жауынгерлік тех­никасын жүргізуді үйрене бастадық. Басында қиын болды. Біз саз балшықты жерде жүргіздік. Бірақ мен машинаны тез игеріп алдым. Маған КамАЗ-ды жүргізу өте ұнайды. Менің ойымша, әскерде әрбір әскери қызметші ұрыс техникасын жүргізе алуы тиіс, – деді 83205 ә/б әскери қызметшісі, аға лейтенант Гүлден Әлиева. Дастан КЕНЖАЛИН, «Егемен Қазақстан»