Қазақстандық жоба қазақша неге сөйлемейді?

«Nurmash» деп аталатын қазақстандық стартап жобасының мобильдік қосымшасы іске қосылды. Бұл туралы кеше Президент жанындағы Орталық коммуникациялар қызметінде өткен баспасөз мәслихатында айтылды. «Nurmash» еліміздегі «Болашақ» бағдар­ламасы­ның түлектері ойлап тапқан қазақ­­стандық жоба. Мұның негізін­де тың идеяның жат­қанын ерекше атап өткен жөн, дейді жоба авторлары. Олар­дың айтуынша, бұл – ыңғайлы әрi пайдалануға жеңiл түрде ойластырылған мобильдi қосымша форматындағы мультимедиялық онлайн-қызмет. Сондай-ақ, жоба авторлары IT жоба арқылы сатушы мен тұтынушы арасында өзара тиімді байланыс орнатуға болатынын жеткізді. Сатушы өз тауарына жарнама жасайды. Тұтынушы болса, сол жарнамадан пайда көре алады. Компаниялар жеке кабинеттерiне кiрiп, промоакциялар ойнатады, қатысушылар смартфондары арқылы аталған промо­акцияларға қатысып, қомақты ақшалай сыйлықтарға ие болады. Ал жыл со­ңын­да промоакциялардың бүкiл қаты­­су­шысының арасында iрi джек-пот ойнатылады. Ол үшін қосымшаны жүктеп, facebook.com, vk.com, plus.google.com немесе Instagram арқылы тіркелу керек. Сосын жеке компаниялар ұсынған промоакциялардың біреуін таңдап, қатысу қажет. Қатысу шарттары – қысқа видеоны қарап шығу, фото жасау, фотомен әлеуметтік желілерде бөлісу немесе бір сұраққа жауап беру. Міне, аталған шарттарды орындап шыққан адам лотереяға қатысады. Оның сыйақы қоры аз емес. Лотереяның қорытындысы бойынша 40-тан астам адам қыруар қаржыны ұта алады. Осылайша, сатушы өз тауарына арзан әрі креативті жарнама жасаса, тұтынушы ақы қажет етпейтін шарттарды орындап, ақшалай сыйақыға ие бола алады. Стартап аясында бүгінде 5 ұлттық және 3 қалалық промоакция басталған. Промоакциялар қатарында әлемдiк фастфуд желiсiнiң аймақтық өкiлдiк компаниясы, банк, iрi супермаркет пен қалалық сауда ойын-сауық орталықтары бар. Жоба авторы әрі «Nurmash-CIS» ЖШС бас директоры Ескендір Қасеновтің айтуынша, бас кезінде олар осы жобаны Америка сияқты үлкен нарықта іске асыруды ойлаған. «Алайда оның авторлары қазақстандық мамандар болғаннан кейін өз елімізде бастауды жөн көрдік», деді Е.Қасенов. Қазіргі күні жобаның бас бөлімшесі АҚШ-та орналасқан. «Кәсiпкерлер үшiн жоба аса пайдалы. Компанияның жеке кабинетiнде аудиторияның құрылымы, географиясы, жас мөлшерi, өнiмге қатысты талаптары мен тiлектерi және өзге де ақпарат болады. Барлық мәлiмет ыңғайлы графикалық сызба түрiнде берiлген», дедi ұйымдастырушылар. Америкада «өмірге келіп», Қазақ­станда жүзеге аса бас­таған жобаның мобильдік қосым­шасына біз де үңіліп көр­дік. Идея авторлары айтқандай-ақ, ақпараттың бә­рі бар. Алайда, бір әтте­ген-айы, орыс, ағылшын тілдеріне таң­дау болғанымен, қазақ тілі жоқ. Бұл қазақстандық жігіттер ойлап тапқан жоба деп қанша мақтанғанымызбен, жобаның қазақша сөйлеуге қауқары келмей тұрғаны көңіл құлазытады екен. Тым болмаса, елімізде үштілділік саясатының қолға алынғанын ескерген жөн болар ма еді. Идея авторлары қазір Қа­зақ­станда басталған жоба болашақта әлемге танымал болады деген сенімде. Оған мүм­кіндігіміз мол, әрине. Себебі, соң­ғы кездегі қазақстандық IT жоба­лар­дың жайы көш ілгері түзеліп, ақпараттық-тех­­нологиялардың барынша күшейіп келе жатқаны сүйсінуге тұрарлық. Алай­да, әттең, қазақ­стандық жобалардың көп­ші­лігінің қазақша сөйлемейтіні қынжылтады. Динара БІТІКОВА, «Егемен Қазақстан»