Олжа тапқан оқушылар

адалдықтың үлгісін көрсетті Сайрам ауданындағы № 26 М.Қашқари атындағы мектептің атағы әп-сәтте аспандап шыға келді. Таңғалғандары да, тамсанғандары да жетерлік. Тіптен, өзге мектептің мұғалімдері өз оқушыларына М.Қашқари атындағы мектепті үлгі етіп, сол мектептің оқушыларындай адал болуға, тәрбиелі де, оқуда озат болуға ша­қырып жатты. Шалғайдағы мектептің бір сәтте бұлайша абыройлы бола қалуы күні кеше өткен сайлауда мектеп директорының басым дауыспен аудандық мәслихатқа депутат болып сайланғаны емес, дәл осы мектепте оқитын екі оқушының қомақты қаржы тауып алып, оны иелеріне қайтаруы болатын. Сол күні мектептен қайтқан оқушылардың ойларында түк жоқ еді. Оқу үлгерімдері жақсы, тәртіптері үлгілі екі оқушы ертеңгі болатын сабақ барысы туралы ой бөлісіп келе жатқан. Кенет, жол жиегінде жатқан әмиянды байқап қалған олар ашып көргенде, өз көздеріне өздері сенбеді. Бір бума кілең 10 мыңдық теңгелерді көріп, абдырап қалғандары рас еді. Отыра қалып санады, тұп-тура 1 миллион 50 мың теңге! Тез шешім қабылданды. Қалайда қаржының иесін тауып, қайтару керек. Осы шешімге тоқталған оқушылар көп ұзамай-ақ жоқ іздеушіні тапты. Ол – белгілі кәсіпкер, ауыл азаматы екен. Кәсіпкердің айтуынша, қаржысын жоғалтқан күні Шымкенттен қажетті тауарлар алу үшін таңертең 1 миллион 50 мың теңге алып шы­­ғып, оны түсіріп алғанын байқамаған. Қар­жысының жоқ екенін білгенде сан соғып, қайдан іздерін білмей тұрғанда... Жоғалтқаны алдынан шықты. Алғаш сенген жоқ, 2 оқушы жоғын қайтарғанда мұндай адалдықты тіптен ойламаған отағасы оқушыларды құшақтап, сүйе берсе керек. Сайрам аудандық ішкі істер бөлімі жер­гілікті полиция қызметінің басшылығы М.Қаш­қари атындағы мектептің оқушылары Тахиржан Урманов пен Әбдінәби Ахмедовті арнайы іздеп келіп, басқарманың Алғыс хатын табыс етті және мектеп әкімшілігіне оқушыларды адалдыққа тәрбиелегендері үшін алғыс айтты. Ердәулет ТҰРАПБЕКҰЛЫ  Оңтүстік Қазақстан облысы, Сайрам ауданы