Өзіңді өзің таны

Қазақ мемлекеттік қыздар педагогикалық университетінде «Өзін өзі тану» пәні бойынша IV республикалық пәндік олимпиада өтті. Өткен жылы Астана қаласында өткен олимпиаданың бас жүлдегері атанған Қыздар университеті биылғы сайысты өткізу мәртебесіне ие болып, өз дос­тарын киелі шаңырақта қарсы алды. Білім және ғылым министрлігі, Қазақ мемлекеттік қыздар педагогикалық университеті және «Бөбек» Ұлттық ғылыми-тәжірибелік, білім беру және сауықтыру орталығының ұйымдастыруымен өткен білім сайысына еліміздегі жоо-лардың әлеуметтік педагогика және өзін өзі тану мамандығы бойынша оқып жатқан 3-ші курс студенттерінен 9 команда қатысты. Осымен төртінші рет өткі­зіліп отырған респуб­ликалық олимпиаданың жастардың жақсы мен жаманды ажырата білу қабілеттерін дамытуда еліміздің бірінші ханымы С.А.Назарбаеваның авторлық «Өзін өзі тану» рухани адамгершілік білім беру бағдарламасының орны ерекше екендігін атап өткен Қыздар университетінің бірінші проректоры Баходир Әлиев қатысушыларға сәт­тілік тіледі. Олимпиадаға қатысу­шылар «Жүректен жүрекке» таныстыру сайысы, «Оқы, оқы және оқы!» теориялық және практикалық білімдер, сұрақ-жауап байқауы, «Біз әлемді жақсартамыз» деген тақырыпта әлеуметтік-педагогикалық жоба қорғау сайысы, «Жалпыадамзаттық құндылықтарды түрлі көркем шығармаларға интеграциялау» сахналық қойылымдар байқауы, «Ұстаз, сіз құр­мет­ті атқа лайықсыз!» эссе жа­зу үй тапсырмасы сынды бес кезеңнен тұратын сайыс­та бақ сынасып, үлкен дайындықпен келгендерін көрсетті. «Дәстүрлі түрде өт­кі­зі­ліп келе жатқан олимпиа­да – «Өзін өзі тану» пәні бойын­ша білім алып келе жатқан студенттерге жақ­сылық, мейірімділік, ты­ныштық, рақымшылық деген қасиеттерді тереңірек түсінуге, ізденуге, жаңа шы­­ғар­машылық ойлар тудыруға, өзіміздің та­ри­хи қалыптасқан із­гі­лік бағытындағы ой­лар­ға тереңірек үңіліп қа­­рау­ға, өзінің өмірімен сабақ­тастыруға және кейінгі ұр­паққа жеткізуде көп мүм­­­кіндік беретін іс-шара. Екін­­­шіден, бұл олимпиада арқылы болашақ ұстаздар теориялық білімдерін практикамен ұштастырып, кә­сіби біліктіліктерін жо­ға­рылатады. Бізді қаты­су­­­шылардың өте жо­ғары дай­ын­­дықпен кел­гендері қуант­­ты», – де­ді уни­вер­си­теттің педа­гогика және пси­хология фа­куль­тетінің де­каны, қазылар алқасының мү­шесі Сайра Жиенбаева. Байқау қорытындысында І орынды Қ.Жұбанов атын­­дағы Ақтөбе өңірлік мем­лекеттік университетінің «Ізгілік шуағы», ІІ орынды Абай атындағы ҚазҰПУ-дің «Мейірім» және Тараз мемлекеттік педагогикалық институтының «Айна­лай­ын», ІІІ орын­ды Қа­зақ-орыс халық­ара­лық уни­вер­си­теті, Ш.Уә­ли­ханов атын­да­ғы Көк­шетау мем­лекеттік уни­­вер­ситеті мен Пав­лодар мемлекеттік пе­дагогикалық инс­­ти­ту­тының топтары өзара бө­лісті. Же­ңімпаздар дипломдармен және арнайы сый­лық­тармен марапатталды. Топтарды дайындаған жетек­шілерге де алғыс хаттар мен сыйлықтар табысталды. Гүлзейнеп СӘДІРҚЫЗЫ, «Егемен Қазақстан» АЛМАТЫ