Үндістанның ұлттық музейі отқа оранды

АСТАНА. 26 сәуір. Үндістанның астанасы Нью-Делидегі ұлттық музей отқа оранды. Бұл туралы «Интерфакс» ақпарат агенттігіне сілтеме жасаған egemen.kz тілшісі хабарлады. Өрт жергілікті уақыт бойынша сағат 01:45-те, ғимараттың алтыншы қабатынан басталған. Қызыл жалынның неден шыққаны әзірге белгісіз. Өрт сөндірушілер оқиға орнына дер кезінде келгенімен, 5 сағаттан кейін ғана сөндірген. Апат кезінде мұражай ішінде ешкім болмаған. Алайда, өрт сөндірушілердің алтауы уланып, ауруханаға жеткізілді. Дәрігерлердің айтуынша, екеуінің халі тым ауыр. Ал қоршаған ортаны қорғау министрі Пракаш Джавадекар қаладағы 34 музейдің қауіпсіздігін тексеруді тапсырды. Бұл музейді Үндістанның бұрынғы премьер-министрі Индира Ганди мемлекет тәуелсіздігінің 25 жылдық құрметіне орай 1972 жылы ашқан. Ғимарат ішінде түрлі жан-жануарлардың, құстардың, сондай-ақ, 160 миллион жыл бұрын жер бетінен жойылып кеткен динозаврлардың тұлыптары бар болатын. Мамандардың болжамы бойынша, көне артефактар ендігі жойылып кеткен болуы мүмкін. Аян Әбдуәли. Дерек, фото: «Интерфакс».