Қостанайдағы тұрғын үй

пенопласт блоктарынан салынатын болды Қостанай қаласында «Бәйтерек» ұлттық басқарушы холдин­гінің қолдауымен 2016-2017 жылдары түрлі қаржы­ландыру институттарын пайдалана отырып, 13 миллиард теңгеге 112 мың шаршы метр қол жетімді әлеуметтік тұрғын үй салу жос­парлануда. Осы екі жылдың ішінде 1800-ден астам отбасы баспаналы болады. Ал құрылысшы фирмалар тұрғын үйді сапалы, тез арада салу үшін қаржымен қатар жаңа технологияларды, жаңа құрылыс материалдарын қолданады. Мысалы, облыс орталығының «Аэропорт» шағын ауданынан төрт бірдей көп қабатты үй түспек. Мердігер «Ирина и К» фирмасы оның бірінің іргетасын қалауға кіріскен. Төрт секциядан тұратын үйде 144 пәтер болады. Жылдың ортасына қарай үйдің іргетасын енді құйып жатқан құрылыс компаниясы желтоқсан айында тұрғындарға пәтер кілтін де тапсырмақ. Мұның барлығы да жаңа технологиямен жасалған құрылыс материалына байланыс­ты екен. Үй тұтастай пенопластан жасалған қабырға блоктармен салынады. – Пенопласты ХХІ ғасырдың құрылыс материалы деп атайды. Оның ені 30 сантиметр, кірпіштен салынған үйдің қабырғасындай болады. Пенопласт жылытқыш материалдың орнын ауыстырады. Салынған үй жылылығымен, тазалығымен ерекшеленеді. Ка­нада мен Ресейдің көптеген қала­ларында  тұрғын үйлердің қан­дай түрі болса да осындайдан тұрғызылады, – дейді «Ирина и К» серіктестігінің жетекшісі Алек­сандр Корчинский. Александр Васильевичтің айтуынша, пенопластан салынған үй кірпіштен өрілген үйге қарағанда 25 пайыз арзанға түседі. Күн өт­кізбегендіктен жазда салқын, ал қыста жылуды сыртқа шашы­ратпағандықтан жылы болады. Нәзира ЖӘРІМБЕТОВА, «Егемен Қазақстан»