«Ұлт жаршысы» журналы

Қазақстанда 50 мың данамен таратылған үш тілдегі тұңғыш басылым Журналдың аты айтып тұрғанындай, басылымның алғашқы санының қазақ­тың белгілі де аса танымал тұлғалы аза­маттарының лебізімен жарыққа шығуы тектен-тек емес екендігі бірден аңғарылады. Академик Төрегелді Шарманов «Басы­лымның құрылтайшылары мен шыға­рушылары бұл іске үлкен дайындықпен келгенін байқатты. Үш тілде жарық көріп отырған үлкен жоба қазаққа көптік етпейді», десе, қоғам қайраткері Мұрат Әуезов «Мұндай жоба қазақ басылымдарында бұрын-соңды болмаған үрдіс», белгілі шығыстанушы ғалым Әбсаттар Дербісәлі «Медианарықтағы бұл жас басылым қазақ тіліндегі материалдарға қатысты бұған дейінгі болып келген олқылықтардың орнын толтырар деген үміттемін», деп ой түйіндейді. Көркемделуі мен беттелуі айрықша «Ұлт жаршысы» мұқабасына Халық қаһарманы Айдын Айымбетовтің суреті салынып, іштегі бірінші беті белгілі журналист Гүлбаршын Сабаеваның ғарышкермен жасаған қызықты сұхбатымен ашылыпты. Ұлттық жеңсік тағамымыз тұшпараның – неліктен «түймеш» аталғаны туралы қызықты мақала журнал оқырманын бей-жай қалдырмасы да анық. Журнал беттерінен кең көлемде орын алған Қазақстанның өнеркәсіп саласындағы инвес­тиция адымы, халықаралық дипломатиялық қатынастар, елдегі орта және шағын бизнес болашағы мен өзге де рухани, мәдени, та­нымдық материалдар қызықты да тартымды. Сондай-ақ, түрлі-түсті көркем журнал атына заты сай – Қазақстанның бүгінгі «өнер жұлдыздары» туралы мақалаларға да ойып тұрып орын берген және әшекейлі суреттермен безендірілген. «Болашақтан келген робот» – әлем таныған танымал боксшы, «қазақтың Ге­насы», Геннадий Головкин туралы қызықты материалды спорт бөлімінің басты мақаласы ретінде оқитын боласыздар. Көпшілік оқырманға арналған түрлі-түсті әшекейлі – қазақ, орыс, ағылшын тілінде жарық көретін көркем журналдың құрылтайшысы – «SAPA MEDIA GROUP» ЖШС еншілес компания­сы болып табылатыны туралы да жалпы оқырман қауымды хабардар еткенді жөн деп таптық. Қазір бүгінгі қазақ баспасөзіндегі ерекше құбылыс – үш тілді «Ұлт жаршысы» көркем безендірілген журналының екінші саны жарыққа шығуға дайындалуда. Талғат СҮЙІНБАЙ, «Егемен Қазақстан» АЛМАТЫ