Күй кеші

Күйші, халықаралық және республикалық байқаулардың лауреаты Айтолқын Тоқтағанның Ұлттық музейде өткен «Бұлбұл» лекция-концерті Дина Нұрпейісованың 155 жылдық мерейтойына арналды. Күй анасы Динаның мерейтойы құрметіне орай өткізілген шарада сөз сөйлеген Ұлттық му­зейдің директоры Дархан Мың­бай құдіретті күй өнерінің кейінгі жас буыны арасында өзіндік қолтаңбасымен танылған Айтолқын Тоқтағанның шығар­машылық жолына сәттілік тілей келіп: «Дина – кешегі халық саз­­герлерінің шығармаларын бізге дейін жеткізген шебер орын­даушы, Құрманғазының шәкірті, қазақтың күйшілік өне­ріне өшпес із қалдырған тұлға. 8-9 жасынан бастап орындалуы қиын күйлерді меңгеріп алған десек, мінеки, біздің өнер жолын­да жүрген талантты Ай­толқындай жастарымыз да осы анамыздан қалған асыл мұраны жалғастырушылар. Сондық­тан да, жас өнерпаздардың шы­ғар­­машылық шабытының шарықтай беруіне тілектеспін», – деді. Мерекелік шара барысында Айтолқын Тоқтаған Дина Нұр­­пейісованың «Көгентүп», «Жаңа бозшолақ», «Он алтыншы жыл», «Бұлбұл», т.б. күй­лерін байырғы үлгісімен, бабына келтіре орындады. Әр күй­дің шығу тарихы мен тартылу ерекшелігі жайындағы тұшымды әңгімелер кеш мазмұнын арттырды. Сонымен қатар, өнерсүйер қа­уым Құрманғазы, Тәттімбет, Дәу­­леткерей, Байжігіт, Сүгір, Сей­тек сынды белгілі халық ком­по­зи­торларының туындыларына қанықты. Күй кешін Қазақстан Рес­публикасы Тұңғыш Пре­зиденті Қоры сыйлығының лауреаты, дәстүрлі әнші Ерлан Рысқали әсем әнімен әспеттеді. Шара негізінен Ұлттық музей жанынан құрылған «Халық қазынасы» ғылыми-зерттеу институтының қазақ халқының дәстүрлі му­зы­калық өнерін жаңғырту мен насихаттауға арналған «Дәстүрлі музыкалық мұра» бағдарламасы аясында ұйымдастырылғанын атап өткен жөн.  «Егемен-ақпарат»