Омбы облысына іскерлік сапар

Таяуда отандық өнімді Ресей нарығында ілгерілету үшін Ауыл шаруашылығы вице-министрі Е.Нысанбаев бастаған қазақстандық делегация Омбы қаласына (Ресей Федерациясы) іскерлік сапармен барды. Сапар барысында қазақстандық агроөнеркәсіп кешені, азық-түлік, құрылыс, химия өнер­кә­сіптерінің және қаптау саласының 20 шақты өндірушілері ресейлік тұтынушы компанияларды өз мүмкіндіктерімен таныстырды. Сапар шеңберінде Ауыл шаруа­шылығының вице-министрі бас­таған қазақстандық делегация Ом­бы қаласының губернаторы, үкі­ме­тінің төрағасы В.Назаровпен кез­десу өткізді. Е.Нысанбаевтың айтуынша, екі тарап өзара сауда-экономикалық байланыстарды тереңдетуге, оның ішінде, ең бастысы, ауыл ша­руашылығы саласындағы биз­нестің дамуына жәрдем ету қажет­тілігін бірауыздан мәлімдеді. «Қазақстан ірі аграрлық мем­­лекет болып табылады. Нарық­­тық экономика талаптарына­ сай қалыптасып үлгірген бұл сала­мыз инвесторлардың қызы­ғу­шылығын тудыруда. Бұл бағыт­та­ғы жақсы бастамалар іске асырылып жатқанына қарамастан, Еур­азиялық экономикалық одақ ая­сында осы байланыстарымызды одан әрі белсендетуге жауаптымыз. Кездесулердің түрлі формат­тары мен алаңдарын дамытуды жоспарлаймыз», деді делегация басшысы. Омбы облысының губернаторы В.Назаров, өз кезегінде Қа­зақ­станмен тауар айналымының кө­лемі тұрақты түрде өсіп жат­қанын айтып, оның негізі ауыл шаруашылығы мен өңдеу өнер­кәсібі өнімдерінен қалыпта­сып отырғанын ескерді. «Біз жаңа бірлескен кәсіп­орындар құруды және сауда қа­­рым-қатынастар дамытуды қалаймыз. Облыс арқылы ірі көлік­тік-транзиттік дәліздер өтуде, сондықтан бірлескен сауданы кеңейту үшін шекараға шектес аймағында бірыңғай логистикалық орталық құру ерекше маңызды әрі қажетті. Омбы облысының транзиттік әлеуетін игеру біздің басты мақсаттарымыздың бірі», деді В.Назаров. Облыс губернаторы қазақ­стан­дық тауарлардың жекелеген жәр­меңкесін ағымдағы жылғы шілде айының соңында Омбы қаласында ұйымдастыруды ұсынды. Іскерлік сапар барысында отандық кәсіпорындар Омбы облы­сының іскерлік орталарымен, ауыл шаруашылығы, азық-түлік, экономика, құрылыс министрліктерімен, сондай-ақ даму және инвестиция агенттігімен келіссөздер өткізді. Сонымен қатар, делегация мүшелері Қазақ тілі және мәдениеті орталығының қызметімен танысты және Омбы қаласындағы Қазақстан консулдығы ғимаратында қазақ диаспорасының зиялы өкілдерімен кездесу өткізді. «Егемен-ақпарат»