Жария ету жұмысы жалғасуда

Кеше Премьер-Министр Кәрім Мәсімов селекторлық режімдегі кезекті Үкімет отырысын өткізді. Онда мүлікті жария ету бойынша науқан өткізу барысы туралы Қаржы министрі Бақыт Сұлтанов мәлімдеді. Оның мәліметінше, қазіргі сәт­те мәлімделген мүлік сомасы елі­міз бойынша 1,4 трлн. теңгеге жет­ті, оның 1,2 трлн. теңгеге жуығы жа­рия етілді. Заңның жаңа шарттарындағы жұмыстың бес айында, яғни 2015 жылдың 1 желтоқсанынан кейін 794 млрд. теңге жария етілді, бұл науқанның барлық кезеңіндегі жалпы соманың үштен екі бөлігін құрайды, деп атап өтті Б.Сұлтанов. «Түзетулер жария ету барысына жақсы серпін бергені көрініп тұр. Кезең бойы науқанның мүм­кін­діктерін 86 мыңға жуық азамат пайдаланды. Өтініштер саны­ның артуы халық тарапынан қызы­ғушылықтың артқанын білдіреді», – деді Қаржы министрі. Ұлттық банк төрағасы Данияр Ақы­шев науқанның әрекет ету ке­зең­інде банктер 910 шот ашып, олар­ға 590,3 млрд. теңге салын­ғанын айтты. «Оған қоса, арнайы шоттардағы барлық ақшаның 83%-ы ағымдағы жылдың төрт айында жария етілді. Осындай шот­тарға ай сайынғы ақша ағы­мы осы жылғы орта есеппен алғанда 148 млрд. теңгені құра­ды, бұл заңнамаға енгізілген өзге­ріс­тердің дұрыстығын тағы да рас­тайды», деді науқанға 30 банк пен «Қазпошта» АҚ қа­ты­сатынын еске салып өткен Д.Ақы­шев. Орман және дала өрттерінің алдын алу мәселелері бойынша Ішкі істер министрі Қалмұханбет Қасымов баяндады. Министрдің мәліметінше, жыл сайын елімізде 4000-ға де­йін орман-дала өрттері орын ала­ды, олар 180 мың га.-ға жуық ау­дан­ды қамтиды, залал 230 млн. теңгеден асады. «Ағымдағы жылдың басынан бастап орман қоры аумағында жалпы ауданы 285 га болатын 16 өрт тіркелді, залал сомасы 1,7 млн. теңгені құрайды. Дала алаптарында 2 180 га көлемді алатын 410 өрт тіркелді. Құрбандар мен залалдар жоқ», деп мәлімдеді ІІМ басшысы. «Ағымдағы жылы Қаз­гид­ро­меттің мәліметінше, шілде-тамызда ауаның орташа температурасы +30 градусқа дейін жететіндігі болжанып отыр. Оған қоса, батыс және оңтүстік облыстарда жауын-шашын тапшылығы күтілуде, сондықтан елдің бірқатар өңірлерінде дала-орман өрттерінің шығу қаупі бар», деп мәлімдеді Қ.Қасымов. Осыған байланысты ІІМ өрт қаупі бар маусымда орман және дала өрттерінің алдын алу және жою бойынша арнайы жоспар жасады. Қазіргі уақытта еліміз бойынша орман-дала өрттерін жою үшін 4779 автокөлік, суағар құрылғылары бар 11 тікұшақ, 47 өрт пойызы және 34 мыңнан астам адам бөлінген. Шекара маңын­дағы аумақтарда өзара іс-қи­мылды пысықтау үшін Ресей және көрші елдердің ТЖМ бөлім­ше­лерімен тактикалық оқу­лар өткізу жоспарланған. Қ.Қасымов 90% жағдайда ормандар адамдардың кесірінен жанатынын еске салып, халық ара­сында профилактикалық іс-ш­а­ра­ларды күшейтуге, азаматтарды өрт қауіпсіздігі ережелері туралы белсенді ақпараттандыруға шақырды. Отырыс қорытындысы бойынша Кәрім Мәсімов мүдделі мемлекеттік органдарға бірқатар тапсырмалар берді. «Егемен-ақпарат»