«Жүрек жылуының» жалғасы

Мына дүниенің тірегі – мейірім. Егерде адамдар бойынан мейірім мен ізгілік жойылар болса, онда жал­ғанда табан тірейтін ештеңе қал­майды. Барлық құндылықтардың қадірі кетеді. Ал мейірімнің үлкен-кішісі болмайды. Кісіге жақсы сөзіңізді арнасаңыз, құлап жат­қанында қолтығынан демесеңіз, дұрыс жолды бағыттасаңыз, жетім-же­сірдің маңдайынан сипап, көмек қолын созсаңыз, байлы­ғы­­ңыз­дан бөліп бермесеңіз де, қар­­жы­лай көмек қылсаңыз, осы секілд­і дүниелердің арғы жағында мейі­рім тұр. Адамгершілік тұр. Бай­лы­ғыңызды бөліп бермесеңіз деген­нен шығады, өткенде Барлық Меңдіғалиев атты кәсіпкер өзінің 40 мың доллар қаржысын қара­мағындағы 117 жұмысшысына тең­дей бөліп берді деген ақпарат оқы­дық. Оқыдық та, оның жігері мен ерлігіне таңғалдық. Дүние сұр­ла­нып тұрған мына заманда мұндай Атым­­тай жомарттың болуы, оның қазақ арасынан шығуы қайран қал­дырд­ы. Ерлік демеске лаж жоқ. Өйткені, мұндай қадамға екінің бірі бара алмайды. Барлық Меңдіғалиевтей бол деп ешкімге ақыл айта алмай­мыз. Бірақ Абай атамның «Болмасаң да ұқсап бақ» деген сөзін қа­перге салғымыз келеді. Былтыр Қызылорда облысында бір із­гі­лікті шара басталды. Ол – «Жүрек жылуымен» деп аталады. Қайы­рым­­дылық акциясының аты айтып тұ­рғандай, бұл – мұқтаж, аз қам­тыл­ған отбасыларға ұлтжанды азаматтар, бизнес құрылымдары мен мемлекеттік, қоғамдық ұйым өкілдері, жомарт жұршылықтың көмек көрсетуі еді. Осы орайда, «Мейірім-Қызылорда» қоғамдық қорына бірінші болып облыс әкімі Қырымбек Көшербаевтың өзі үлес қосқанын айта кету керек. Атал­ған шара аясында 7 миллион теңге жиналды. Жиналған қаржыға 1200 отбасына материалдық көмек көр­сетілді. Жалпы, қайырымдылық акция­сы ба­рысында бірінші қа­жет­­тіліктегі азық-түлік және бас­қа да ке­ректі заттар тиелген 22 авто­­кө­лік тұрмысы төмен отбасы­лар­ын ара­лап, таратып берді. Мұн­дай ауқымды қайырымдылық акциясы Сыр өңірінде алғаш рет ұйым­дас­тырылып отырғанын да сөз ара­сына сыналай кетейік. Сонымен акция бір күндік болып қана қалды ма? Жоқ. Игілікті шара биыл да өз жалғасын тапты. Әсіресе, аталған акцияға Қызылорда қалалық мәслихатының депутаттары белсене атсалысуда. Мәслихат хатшысы Роза Боханова әріптестерін «Жүрек жылуымен» акциясына қатысып, өз округ­теріндегі әлеуметтік жағы­нан аз қам­тылған отбасыларға көмек­­те­су­ге шақырды. Солайша, қала­дағы 19 сай­­лау округіндегі мұқ­таж от­басы­лар­дың тізімі жа­салып, депу­тат­тар акцияны қолдауды бас­тап кетті. Бұл шараның бір реттік емес, жыл со­ңы­на дейін жалға­са­тынын айтқан абзал. «Жүрек жылуымен» акциясына ең алдымен Әжібек Мампаев, Бақдәулет Ысқақов, Илларион Ли, Әнуар Нақып, Сәбит Пазылов, Талғат Мақашов, Нұрболат Ибраев, Жасұлан Жарасбаев секілді депу­таттар белсене атсалысты. «Бір қо­­лың­­ның бергенін, екінші қолың біл­месін» деген тәмсіл бар. Халық сай­лаған депутаттар жасаған жақ­сылығын, көрсеткен көмегін айдай әлемге жар салып айтып жатқан жоқ. Дегенмен, мұндай істен ел хабардар да болуы керек қой деп ойлаймыз. Шара барысында тұрмыста қажет­ті, ең бірінші тұтынатын азық-тү­лік жиналды. Ол қаладағы 16 о­тба­сына таратылып берілді. Әр депу­тат үйлерді өзі аралап, ха­лық­тың тұр­мыс-тіршілігімен таны­сып, мұқ­таж­дықтарын біліп, көмегін көр­сетіп кетті. Қара­­па­йым жұрт­шылық халық қалау­лы­лары­ның өздеріне көңіл бөліп, мұң-арызын тыңдап, қолдан келгенше жәрдем еткеніне шын ниетімен алғысын айтты. Бұл да болса адамгершілік, мейі­рім атты қасиеттердің жоғалма­ға­ны­­нан, адамдардың бір-біріне бо­лы­су ниетінен туған шара дер едік. Ержан БАЙТІЛЕС, «Егемен Қазақстан» ҚЫЗЫЛОРДА