Күндіз-түні тыныштық күзетіндеміз

Майор Айдар Гауһаров – Мәскеуде өткен халықаралық «Авиадартс-2015» әскери ойынына қатысқан қазақстандық үш ұшқыштың бірі. Ресей, Қытай, Қазақстан және Беларусь мемлекеттерінің таңдаулы ұшқыштары қатысқан халықаралық байқауда Айдар бастаған жігіттер Ресейден кейінгі екінші орынды иемденді. – Айдар Төлегенұлы, екінші орын алды деген айтуға ғана оңай. Ресейдің әуе күштері әлем­де ең үздіктердің қатарында. Қытай­дың әскери техникаға мол қар­жы салып жатқандығы белгілі. Осындай жағдайда біздің жігіттердің еңбегін қалай бағала­саң да жарасады. Жарыс қалай өтті, бір эпизодын айтып берші? Үшінші санаттағы ша­­буыл­даушы ұшақтың коман­дирімен әңгімеміз осылай бас­талған. – Расында, қатты толқыдық. Өзі­міздің ұшағымызбен ұшып барғанбыз. Ал әуеден атқылайтын қару түрлеріне Ресей жағы кө­мектесті. Бір сәтін айт дедіңіз ғой, мәселен, мынадай тапсырма бе­ріледі. Тоғай ішінде жаудың 3-4 танкі, ашық жерде ұшақтары бар. Тапсырма бойынша олардың жасырылған жерін дәл тауып, әуеден жойып жіберуің керек. Жоғарыда жүрсең атып түсіреді. Сондықтан, сағатына 500-600 шақырым жылдамдықпен 200 метр­ге дейін төмендеп ұшып, танк, ұшақтардың жасырылған жерін тауып шабуыл жасадық. – Атып жүргендерің муляж танк, ұшақ па? Зеңбіректеріңнің снарядтары қандай? – Шын танк, шын ұшақтар. Бірақ, ескі, қолданыстан алынған техникалар. Біз осы тапсырманы орындауда көзге түстік. – Көңілдерің марқайған шы­ғар? – Әрине, қуанышқа кенелдік. Әлемдегі мықты державалардың алдында мықты шыққанымызға. Қазақ­стан байрағын көкте желбі­реткеніміз марқайтты. Аллаға шүкіршілік қылдық. Елбасымыз Нұрсұлтан Әбішұлы Назарбаевқа рахмет айттық. Өйткені, мемлекет авиацияға жеткілікті қаржы салмаса, құр өлермендік табысқа жеткізбейді. Техникаларымыз жаңарды. 2005 жылға дейін керосинмен ұшып келсек, қазір ұшақтарымыз жоғары сапалы бензин тұтынады. – Қала балаларын қайдам, ауыл балаларының дені «Кім бо­ласың?» – десең, ойланбас­тан «Ұшқыш боламын!» деп тақ етер еді. Өзің кім болуды армандап едің. Тұқымдарыңда әскери ұшқыш болды ма? – Әкемнің әкесі Шабдан ата­мыз Екінші дүниежүзілік соғысқа ұшқыш болып қатысты. Таш­кенттегі әуе училищесін бітірген десе-ді. Хабар-ошарсыз кетіпті. 8-сыныпқа дейін Шымкенттегі академик Ө.Жолдасбеков атын­дағы мектепте оқыдым. Одан кейін Астанадағы «Жас Ұлан» әскери мектебінде 11 жылдықты тәмамдадым. 2013 жылы Ақтө­бедегі әуе қорғаныс күштері әс­кери институтын бітіріп ұш­қыш-инженер мамандығын алып шықтым. Алматы, Балқаш қа­лаларында, кейін Шымкентте жұ­мыс жасап жатырмын. МиГ-29 ұшағымен ұшамын. Осының бәрі бала кезімдегі «ұшқыш боламын» деген арманымды орындағаным болар. Оның алдында Як-80, Л-29 ұшақтарын басқардым. Біз – әскери адамбыз. Мемле­кетіміз, халқымыз Отанын қор­ғайтын ұлым бар деп бізге се­ніп отыр. Сол сенім бізге қа­нат бітіреді. Күндіз-түні әуе ке­зек­шілігінде болып, ел ты­ныш­тығын қорғаймыз. Майор Гауһаров осылай деген. 3-ші санаттағы ұшқыш, әуеде 380 сағат ұшу тәжірибесі бар, халықаралық «Мирное небо», «Взаимодействие», «Боевое содружество» және «Степной орел» сияқты әскери-жаттығу жиындарына қатысқан А.Гауһаров «Отан қорғау – ер жігіттің ісі» дегенді айтады. Әңгімелескен Бақтияр ТАЙЖАН, «Егемен Қазақстан» Оңтүстік Қазақстан облысы