Президент Жер кодексіндегі түзетулерге мораторий жариялады

АСТАНА. 5 мамыр. Қазақстан Президенті Нұрсұлтан Назарбаев Жер кодексіндегі түзетулерге мораторий жариялады. Бұл туралы Ақорданың баспасөз қызметіне сілтеме жасаған egemen.kz тілшісі хабарлады. «Халыққа ауылшаруашылық жерінің сатылмайтынын түсіндіру керек еді. Егер қазақстандықтар қабылданған шешімге сенбесе, түсінбесе, онда ол дұрыс емес. Біз мұның барлығын халық үшін істейміз. Қоғамда бірқатар заңнамалық норма бойынша күмән туды», – деді Мемлекет басшысы Ақордада өткен кеңес отырысында. Сондай-ақ, Президент: «Сондықтан да мен мынадай шешім қабылдаймын. Жер кодексінің қоғамдық резонанс тудырған бірқатар нормалары, нақты айтқанда, былтырғы енгізілген төрт норманы күшіне енгізуге мораторий жариялаймын. Алдымен жағдайды егжей-тегжейлі қарап, халыққа түсіндіріп, Парламентпен бірге шешсеңдер, мораторийді түсіреміз, болмаса, түсірмейміз», – деді. Талғат Райымбек. Дерек, фото: Ақорданың баспасөз қызметі.