Елбасы екі министрліктің өз міндеттерін орындай алмағанын айтты

АСТАНА. 5 мамыр. Ақордада өткен кеңес отырысында Қазақстан Президенті Нұрсұлтан Назарбаев екі министрліктің өз міндеттерін орындай алмағанын мәлімдеді. Бұл туралы nur.kz-ке сілтеме жасаған egemen.kz тілшісі хабарлады. Кеңес отырысында Мемлекет басшысы жер заңнамасының нормаларын түсіндіруге министрлердің жеке жауапкершілігін енгізді. «Екі мемлекеттік орган – Ауыл шаруашылығы және Ұлттық экономика министрлігі жер кодексі бойынша жұмыс жүргізді. Олар бұл міндетті орындай алмады. Мен министрліктер жаман жұмыс істеді деп айтқым келмейді. Бірақ барлығына түсінікті болатындай, қабылдайтындай өз ұстанымын түсіндіре алмады. Сондықтан мен бүгін бірқатар шешімдер қабылдаймын», – деді Президент. Айта кетейік, бүгінгі жиында Мемлекет басшысы Ұлттық экономика министрі Ерболат Досаевты қызметінен босатып, Асылжан Мамытбековке сөгіс жариялады. Талғат Райымбек. Дерек: nur.kz. Фото: egemen.kz.