Парламент

«Мәңгілік Ел» – бабалар аманаты

Мәжіліс депутаттары Қуаныш Сұлтанов, Ахмет Мурадов, Бейбіт Мам­раев, Сапар Ах­ме­тов және Бақытгүл Хаме­нова Атырау жұртшы­лы­ғымен кездесулерде «Мәң­гілік Ел» Патриот­тық актісінің қабыл­дануының маңызын түсіндірді. Депутаттардың пікірінше, тәуелсіздік алғалы бері елімізде баршаны елдік, отаншылдық мүддеге біріктірген алуан-алуан істер атқарылып келеді. Соның ең бастысы – «Мәңгілік Ел» идеясы. Ұлы Дала елінің әлемдік қоғамдастыққа ішкі тұрақтылығымен, этносаралық келісім мен бірлікті, ынтымақ пен достықты нығайта алған реформалардың жемісті болуымен танылуының түпкі мақсаты – ең дамыған 30 елдің біріне айналу. Мәңгілік Ел болуды бабаларымыз да аңсады. Бұл аңсарлы мақсатты іске асыруда Елбасы Нұрсұлтан Назарбаевтың ерен еңбегі бар. – Қазақ жерінің аумағымен Ұлы Жібек жолының өте бастағанына 2000 жылдан асты. Сол кездің өзінде еліміз сауда керуендерінің қарым-қатынастарының, тауар алмасу жүйесінің бір ретке келуіне ықпал етіп отырған. Қазіргі таңда біздің тәуелсіз Қазақстанымыз әлем елдерімен тек дипломатиялық, экономикалық қатынасты ғана емес, сондай-ақ, көптеген елдермен білім мен ғылым, мәдениет, медицина салаларында, тіпті, жаңа технологиялар жүйесінде әріптестікті жетілдіріп отыр. Біз әлем елдерімен біліммен, ақылмен бәсекелес бола аламыз, – деді Мәжіліс депутаты Қуаныш Сұлтанов. Мәжіліс депутаты Сапар Ахметовтің айтуынша, еліміздің әр өңірінде 800-дей жаңа кәсіпорын құрылды. Машина жасау өндірісі дамып, жаңа технологиялар әр салада енгізілуде. «Нұрлы Жол» бағдарламасы аясында 7000 км. жол салынып жатыр. Кездесулерде ел өміріндегі өзге де өзекті мәселелерге қатысты келелі әңгіме қозғалды. Жолдасбек ШӨПЕҒҰЛ, «Егемен Қазақстан» АТЫРАУ

 Кестеге сәйкес өткен кездесулер

Мәжіліс депутаты, «Нұр Отан» партиясы фракция­сы­ның мүшесі Жексенбай Дүйсебаев Маңғыстау облы­сы­ның елді мекендерінде сайлаушылармен кездесулер өткізді. Депутат Ақтау қаласындағы «Маңғыстау АтомЭнерго Комбинаты» ЖШС-інде, Маңғыстау ауданының орталығы Шетпе ауылында орналасқан «Каспий Цемент» ЖШС-інде жұмысшылармен кездесті, сондай-ақ, ауданның еңбек ардагерлерімен, аудан ақсақалдарымен, тұрғындарымен жүздесті. Кездесулер барысында бүгінгі күннің кейбір көкейкесті мәселелеріне байланысты әңгіме қозғалды. Ж.Дүйсебаев, сонымен қатар, кеше Түпқараған ауданында жергілікті тұрғындармен, еңбек ардагерлерімен бірқатар кездесулер өткізді және «Нұр Отан» партиясының облыстық филиалында жергілікті бұқаралық ақпарат құралдары өкілдеріне арнап брифинг берді. Гүлайым ШЫНТЕМІРҚЫЗЫ, «Егемен Қазақстан» Маңғыстау облысы   Ашық сауал, тұщымды жауап Парламент Сенатының депутаты Бектас Бекназаров пен Парламент Мәжілісінің депутаты Бақытжан Ертаев Жамбыл және Жуалы аудандарының тұрғындарымен кездесті. Алдымен екі ауданның біраз ауылдарына атбасын бұрып, жергілікті жұртпен емен-жарқын әңгімелесті.   Оралхан ДӘУІТ, «Егемен Қазақстан»   Депутаттардың бұл кездесуі аудан орталығындағы Мәдениет сарайында жалғасын тапты. Жиында заң шығарушы қос палатаның қазіргі тыныс-тіршілігі, құқық қорғау саласына қатысты заңдардағы өзгерістер, елдің жағдайы, ауыл халқының тұрмысы кеңінен әңгіме болды. Жиналған қауым көкейлеріндегі сауалдарын қойып, екі ортада ашық үнқатысу орнады. Б.Бекназаров пен Б.Ертаев көпшілікке толғандырған сұрақтарына қатысты ұғынықты негізде мағлұматтар берді. Әрине, әр саланың өз мамандары бар. Олар өз кәсібінің қыр-сырын бес саусағындай білсе керек. Осы орайда, аудан халқы көкейлерінде жүрген сауалдарын ашық жолдап, өз ойларын да ортаға салып, тұщымды жауаптар алды.   Жамбыл облысы