Қарт майдангерді ұлықтады

Оңтүстік Қазақстан облыстық соты­ның ұжымы Ұлы Отан соғысының арда­гері, Қазақстан Республикасының құр­метті судьясы Айтжан Бекназаров ақса­қалды Жеңіс мерекесімен құттықтады. Сот ұжымы қарт майдангерді соғыс және еңбек ардагерлерінің есімі жазыл­ған Даңқ тақтасының жанында қарсы алып, ескерткішке гүл шоқтарын қойды. Күндей күркіреп өткен соғыстың бел ортасында болған Айтжан ақсақал кешегі қарулас достары туралы естеліктер айтты. Даңқ тақтасына есімі алтын әріппен жа­зылған ардагер судьялардың екеуі Ке­ңес Одағының Батыры екендігін еске алды. Салтанатты шарада этномәдени бірлестіктердің өкілдері де өз құттық­тау­ларын жеткізді. – Біз көрген сұрапыл соғысты кейін­гі ұрпақ көрмей-ақ қойсын, – деді Айт­жан ақсақал. – Еліміздің Мемлекет бас­шысы Нұрсұлтан Назарбаев адамзат баласын ауыр зардапқа ұшырататын ядролық қаруды таратпау жөнінде дүниежүзінің басшыларына үндеу жариялады. Өйткені, ендігі соғыста жеңімпаздар болмайды. Еліміз аман, жұртымыз тыныш болсын. Қазақстанымыз дәуірлей берсін. Жүзге аяқ басқан абыз ақсақалдың тілегі осы. Бақтияр ТАЙЖАН, «Егемен Қазақстан» Оңтүстік Қазақстан облысы