Батыр мүсіні

Өскеменде Жеңіс күні қарсаңында Кеңес Одағының Батыры Ізғұтты Айтықовқа бюст қойылды. Облыс орта­лығының Металлургтер кентіндегі батыр атындағы көшенің жиегінен орын тепкен ескерткішті Жаңабай Әшімов бастаған жерлестері орнатты. Ескерткіштің тұсаукесеріне жи­нал­ған жұрт хас батырдың бейнесі ой­да­ғыдай сомдалғанын жеткізді. Жергілікті ақын Нұртай Тілеужанұлы: «...Өс­кеменнің шығысынан кірген елді, қа­зақтың хас батыры қарсы алады» деп жырдан шашу шашты. Расында, өзінің 22 жыл қысқа ғұмырында өшпес ерлігімен тарихта қалған баһадүрдің ескерткіші қалаға кірген жолаушының назарын бірден аударатын оңтайлы жерге қойылғанын айта кеткен ләзім. Кеңес Одағы Батырының атында осыған дейін Шығыс өңірінің Ұлан ауданында бір мектеп пен бір ауыл бар еді. Енді облыс орталығынан көше беріліп, ескерткіші орнатылды. «Ер есімі – ел есінде» деген осы. Ұлан ауданы ақсақалдар кеңесінің төр­ағасы Рашидбек Мұхамеджан ес­керт­­кішті құюға көмек қолын созған атым­­тай азаматтарға алғысын айтты. Ашылу салтанатына жиналған жұрт­шы­лық батыр рухына тағзым етіп, ескерт­кіштерге гүл шоқтарын қой­ды. І.Айтықов атындағы мектептің өрен­дері батыр аталарына арнаған жырларын оқып, ел рухын көтерер асқақ әндерін шырқады. Думан АНАШ, «Егемен Қазақстан» ӨСКЕМЕН