Ардагерлер ардақталды

Теңдесі жоқ қаһармандықтың, ерліктің және бейбіт тұрмыс пен Отанның бостандығын қорғап, халқымыздың рух күшінің символына айналған адамзат тарихындағы ең қантөгіс соғыста 55 солтүстікқазақстандық Кеңес Одағының Батыры, 11-і «Даңқ» орденінің толық кавалері атанды. Аты аңызға айнал­ған 314-ші атқыштар дивизиясы Қызылжар өңірінде құры­лып, 20-дан астам қала мен 1 мыңға жуық елді мекенді жаудан азат етті. Ұлы Жеңіс күні сұрапыл қан майданда от кешкен кешегі жа­у­ын­­­герлердің – бүгінгі май­дан­гер­лердің ерлік жолдары өскелең ұр­пақ үшін үлгі-өнеге мектебі, Отан­ға деген адалдықтың үлгісі ре­тін­де ардақталып, лайық­ты түр­­де атап өтілді. Театр ала­ңын­­да өткен ми­тингте аймақ бас­­шы­сы Ерік Сұлтанов сөз сөйлеп, сол­­түс­­тік­қа­зақ­­­стан­­дық­­тар­дың ор­тақ же­ңіс­ке зор үлес қос­қа­нын, бү­гін­гі күні бірлік пен келі­­сім басты құн­дылығымыз бо­лып табы­ла­тынын көлденең тартты. Қала жұрт­­шылығының қатысуымен «Же­ңіс» стелласына, «Мәңгілік алау­­­ға» гүл шоқтары қойылып, ел, же­р үшін жандарын пида ет­­кен боз­­­дақтардың рухы еске алынды. Орталық алаңда «Ешкім де, еш­теңе де ұмытылмайды» тақыры­бын­да ұйымдастырылған патриоттық ком­позиция май­дан даласына ат­тан­ған жауын­герлердің ерлікпен өріл­ген өмір­лерін көз алдымызға елестетіп, патриоттық сезімдерге қозғау салды. Содан бері арада қаншама жыл өтсе де, жеңіс даңқы халық жадынан өш­пейтінін, жүректерде мәңгілік сақ­та­латынын тағы бір айғақтап берді. Қаланың басты көшелерімен мотошеру, автошеру колон­налары сап түзеп өтіп, мереке шырайын аша түссе, «Мәңгі өлмес полк» парадына қаты­су­шылар қатары өте қалың бол­ды. Концерттік бағдарламаға этномәдени бірлес­тіктер де белсене қатысып, түрлі тілдерде жеңіс ән­дерін әуелете шырқады. Жеңіс мерекесі түнгі от­шашуға жалғасты. Өмір ЕСҚАЛИ, «Егемен Қазақстан» ПЕТРОПАВЛ