Жезқазғанда мас жүргізуші полицияға қол жұмсады

ҚАРАҒАНДЫ. 12 мамыр. Жезқазған қаласының тұрғыны полиция қызметкеріне қол жұмсағаны үшін қамауға алынды. Бұл туралы облыстық ішкі істер департаментінің баспасөз қызметіне сілтеме жасаған egemen.kz тілшісі хабарлады. «Жезқазған-Ұлытау» тас жолында жылдамдықты шамадан тыс асырған «Ниссан-Цефиро» автокөлігінің жүргізушісі полиция қызметкерлерінің тоқтатқан талабына бағынбай, Жезді кентіне қарай қашып кетпек болған. Алайда, 29 жастағы ер адамның бұл әрекеті іске аспай, тәртіп сақшыларының қолына түсті. Кейін анықталғандай ол автокөлікті мас күйінде жүргізген. Полиция қызметкерлері оны наркологиялық диспансерге жеткізгенде жүргізуші полиция сержантына қол жұмсап, сондай-ақ, кірпіштің сынығымен арнайы көліктің артқы терезесін сындырған. Қазіргі уақытта күдікті уақытша ұстау оқшаулағышында отыр. Сотқа дейінгі тергеу амалдары жүргізілуде. Қайрат Әбілдинов. Дерек, фото: egemen.kz.