Елімізде Жер реформасы жөнiндегi комиссия құрылды

АСТАНА. 12 мамыр. Президенттiң тапсырмасымен елiмiзде Жер реформасы жөнiндегi комиссия құрылды. Бұл туралы bnews.kz-ке сілтеме жасаған egemen.kz тiлшiсi хабарлады Комиссияға Премьер-министрдің бiрiншi орынбасары Бақытжан Сағынтаев төрағалық етедi. «Елбасының тапсырмасына сәйкес, Жер реформасы жөніндегі комиссия құрылды. Комиссия құрамына 75 адам кіреді, олардың iшiнде Сенат және Мәжiлiс депутаттары, Үкiмет мүшелерi, мемлекеттiк органдардың, саяси партиялардың, агробизнес өкiлдерi, ғалымдар, қоғам белсендiлерi бар. Комиссияда барлық өңiрлердiң өкiлдерi қамтылған. Бiз елiмiзді, оның бейбiт болашағы үшiн алаңдайтын азаматтарды ынтымақтасуға шақырдық», – дейді Бақытжан Сағынтаев. Сондай-ақ, комиссия төрағасының айтуынша, халықты барынша қамту үшiн облыстық әкiмдiктiң жанынан құрылған қоғамдық кеңестер де осы жұмысқа белсенді араласпақшы. «Комиссия бiздiң азаматтарымыздың пiкiрталастарының барысы туралы барынша шынайы ақпаратты бұқаралық ақпарат құралдары арқылы ашық түрде алуы үшiн жұмыс iстейді», – дейдi ол. Бұдан бөлек, арнайы Jerturaly.kz порталы iске қосылды. Порталда комиссияның жұмысы туралы барлық ақпарат жарияланады. «Бұл сайтта адамдар көкейтестi сұрақтарын қойып, өз ұсыныстарын қалдыра алады. Қосымша арнайы Call-center жұмыс істейді», – дейдi комиссия төрағасы. Айта кетейік, Жер реформасы жөнiндегi комиссияның алғашқы отырысы 14 мамыр күні Астанада өтедi. Сондай-ақ, комиссия мүшелерi өңiрлерге баруды жоспарлап отыр. Талғат Райымбек. Дерек: bnews.kz. Фото: egemen.kz.