Қымыздан балмұздақ жасау жобасы әлемдік кубокка жолдама алды

ПАВЛОДАР. 12 мамыр. Бұған дейін С. Торайғыров атындағы Павлодар мемлекеттік университеті командасының бұл жобасы Enactus Kazakhstan National EXPO 2016 студенттік жастардың әлеуметтік және бизнес-жобаларының республикалық байқауында жеңімпаз атанды. Бұл туралы egemen.kz тілшісі хабарлады. Білім және ғылым министрлігі мен Президент жанындағы жастар саясаты жөніндегі кеңестің қолдауымен өткен байқауға еліміздің жоғары оқу орындарынан 42 команда қатысты. Университет командасы экономикалық, экологиялық, әлеуметтік мәселелерді шешуге бағытталған іс жүзінде жұмыс жасап жатқан 4 жоба ұсынды. «Қазақстанды қалай тамақтандыруға болады?» бизнес-жобалар байқауында студенттер қымыздан жасалған балмұздақ идеясы үшін 1 миллион теңгеге ие болды. Enactus PSU командасының капитаны Арнагүл Бүркүттің айтуынша, студенттер университет қабырғасында алған теориялық білімі мен кәсіпкерлік қабілеттерін тәжірбиеде қолданады. Ол: «Команданың әрбір мүшесі еліміздің экономикасы мен мәдениетінің дамуына өз үлестерін қосып келеді. Біздің идеялар ғаламдық идея», – дейді. Универсиет командасы жеңімпаз ретінде биыл қазан айында Торонто қаласында (Канада) өтетін Enactus 2016 әлемдік кубогында еліміздің атынан қатысады. Фарида Бықай. Дерек, фото: egemen.kz.