Мүмкіндігіңді пайдалан, мүлкіңді жарияла!

Мүлікті жария ету бойынша ра­қымшылық биылғы жылдың соңына дейін созылғандықтан Семей қа­ласында осыған орай жұмыстар қызу әрі қарқынды жүріп жатыр. Комиссияға әртүрлі сұрақтары бар адамдар көптеп келуде. Мәселен, Ресейдегі ақшаларымды жарияласам бола ма деп сұрағандар да жетерлік. Бірақ, шетелдегі ақша мәселесі біздің құзырымызда емес дейді, Семей қаласындағы мүлікті жария ету бойынша комиссия хатшысы Әсем Балапанова, бізде тек жылжымайтын мүлікті жариялау ғана қарастырылған. Және тағы бір мынандай сауал қойылды: мем­лекеттің рұқсатымен алынған жер учаскесіне үй салынған. Алайда, бұл үйдің құжаттары жоқ. Осы үй мен жерді тіркеуге тапсыруға бола ма? Және осы ретте мүлікті жария ету акциясының жеңілдіктерін пайдалану мүмкіндігі бар ма? Әсем Балапанованың айтуынша, егер мемлекет жер учаскесін берсе, он­да салынған құжатсыз үйді де жа­рия етуге болады. Мемлекет бұл акцияны осындай жағдайлар үшін ұйымдастырып отыр. Ол үшін үй салған азамат жергілікті әкім­дік қасынан мүлікті жария етуге қа­тысты құрылған комиссияға өті­ніш­ пен өзінің жеке басын куә­лан­­­ды­ратын құжатты тапсырып, өті­ніш­те өзінің жоғарыдағы үйге қа­тыс­ты мақ­сатын айқын жазуы қажет. Семей қаласындағы мүлікті жа­рия ету бойынша комиссия хатшысы Әсем Балапанова мысалға келтіргендей, бастапқы кезде үй-жайларын жариялағандар көп келген. Кейінірек жекеменшік кафе, монша сияқты бизнес нысандарын жариялауға да халық құлшыныс біл­діре бастапты. Семейде мүлікті жа­рия­лауға деген ықылас ерекше болып тұр. Тұрғындардың белсенділігі жоғары. Мүлікті жария ету дегеніміз – табыстарды жасыру мақсатында заңды экономикалық айналымнан шығарылған және еліміздің заңнамасына сәйкес ресімделмеген, не тиісті емес тұлғаға ресімделген мүлікке құқықтарды мемлекеттің тану рәсімі екендігін атап өту қажет дейді, Семей қаласындағы мүлікті жария ету бойынша комиссия хатшысы Әсем Балапанова. – Семей қаласы бойынша 2014 жыл­дың 1 қыркүйегінен бүгінгі күнге дейін мүлікті жария етуге 291 өтініш қабылданды, – деді мүлік­ті жария ету бойынша комиссия хат­шысы Әсем Балапанова – оның ішінде жалпы құны 741,7 млн. теңге болатын 233 өтініш қана­ғат­тандырылды. Мүлікті жария ету – табыстарды жасыру мақсатында заңды экономикалық айналымнан шығарылған және Қазақстан Республикасының заңнамасына сәйкес ресімделмеген, не тиісті емес тұлғаға ресімделген мүлікке құқықтарды мемлекеттің тану рәсімі болып табылады. Мүлікті жария ету науқаны Қазақстан азаматтарына, оралмандарға және Қа­зақстан Республикасында тұру­ға ықтиярхаты бар адамдарға, олар­дың жылжымайтын мүліктерін заңдастыру үшін жарияланды. Сондықтан көлеңкелі экономиканы мейлінше азайту мақсатында біздер бірлесе отырып осы басталған үдерісті аяқтап шығуға тиіспіз. Ол біздің азаматтарымыздың адал болып, алаңсыз ұйықтап, салықтарды уақтылы төлеп, жауапкершілікке тартыламын деп алаңдамай өмір сүрулері үшін қажет.  Раушан НҰҒМАНБЕКОВА СЕМЕЙ