Асқақтатқан
Руханият • 13 Ақпан, 2022
«Балалар әдебиетінің бәйтерегі» атанған белгілі қаламгер Сапарғали Бегалиннің отбасында дүниеге келіп, қазақ киносының іргетасын қалағандардың қатарында есімі тарих парағына жазылып, «Бұл Шұғылада болған еді», «Оның күні туады», «Тұлпардың ізі», «Мәншүк туралы баллада», «Артымызда Москва» сияқты сүбелі дүниелерімен ел есінде қастерленіп келе жатқан режиссер Мәжит Бегалиннің мерейлі 100 жасы – ұлттық кинематографиядағы атаулы күн. Он тоғыз жасында мектеп бітіре сала майдан шебінен табылған Мәжит бүкіл Бегалиндер әулетінен соғысқа аттанған алтаудың ең кішісі еді. Мәжит те Төлеген Тоқтаров, Мәншүк Мәметова, Сұлтан Қожықов, Тахауи Ахтанов, Әзілхан Нұршайықовтармен бірге әйгілі 100-атқыштар бригадасының құрамында жаумен шайқасты. Жиырма жасында бір қолын соғысқа тастап кеткен ол, келешек асыл мұратын жаңадан қанат қаққан ұлттық кино өнерінің көкжиегін кеңейту жолына арнады.
