Қоғам • 26 Желтоқсан, 2022

Соттар да сыбайлас жемқорлыққа ұрынған ба?

Қараша айында «Egemen Qazaqstan» газетіне «Солқылдақ сот әділетті Қазақстанға қалай қызмет етеді» деген бір беттік көлемді мақаламыз шықты. Қысқаша ғана мазмұнын еске түсірер болсақ, мақалада Мұқаш Қабдіров деген азаматтың саяси қуғын-сүргіннің зардап шегушісі болып сот арқылы танылғаны, облыстық прокуратура оны ақтағаны айтылған. Енді қуғын-сүргіннің зардап шегушісі ретінде оның тұрғын үй талап еткені (өйткені тұрғын-үй жағдайын жақсартуды сұрап 2010 жылдан бері кезекте тұр), бірақ Петропавл қалалық тұрғын-үй коммуналдық шаруашылығының комиссиясы сол үйді бергенде оның отбасы мүшелерінің саны 5 адам екенін, өзінің үшінші топ мүгедегі екендігін ескермей төртінші қабаттан бір-ақ бөлмелі үйді жекешелендіру құқығынсыз бергені, ал Қабдіров жеделсатысы жоқ үй болған соң мүгедектігіне байланысты төменгі қабаттан үш бөлмелі үйді заңға сәйкес жекешелендіру құқымен беруді екі жылдан бері талап етіп, соттасып жүргені туралы жазылған. Судьялардың алдымен бір шешім шығарып, бірақ орындаушылық қағаз бермей артынан өздерінің шешімінен тайқып, басқа шешім қабылдап, адамды әбден әуре-сарсаңға салғандығы, сол себепті құқығын таптап жүргені айтылған. Осы оқиғаға қайта оралуға тура келіп отыр.