Тоғыз жастағы жұдырықтай қыздың батылдығына таң қалмасқа шараң жоқ! Былтыр ол өзіне төнген қауіпке қарамастан, автокөліктің астына түсе жаздаған баланы құтқарып қалған болатын. Ал биыл...
Биыл қарағандылық Анастасия Пхенда тағы да батылдығымен көзге түсті. Оқиға былай болған еді. Бес жастағы Руслана деген қыз бала ойнап жүріп, су толы терең орға құлап кетеді. Мұны байқап қалған Анастасия суға батып бара жатқан қыздың қолынан ұстап алып, жағаға тартып шығарған.
«Ор өте терең болды. Мен жүгіріп барғанда Руслананың қолы ғана көрініп жатты. Қорыққанымды ұмытып, қолынан тарта бердім», дейді өжет қыз.
Ажалдың аранынан балақайды құтқарып қалған батыл қызды облыстық Төтенше жағдайлар департаментінің басшылығы Алғыс хатпен және естелік сыйлықпен марапаттады.
Настя Пхенда өскенде құтқарушы болғысы келеді екен. Төтенше жағдайлар департаментіндегілер кезі келгенде мұндай батыл да өжет балақайларды өз қатарларына бірінші кезекте қабылдайтындарын айтты.
Қайрат ӘБІЛДИНОВ,
«Егемен Қазақстан»
ҚАРАҒАНДЫ