Ақын сыйға тартқан кітапхана

Зайсан ауданы тұрғындарының сүйікті орнына айналды «Кітап – білім бұлағы» деп қалай орынды айтылған. Осы­дан 50 жылдай бұрын білім ордасының қара шаңырағы  ҚазМУ-дің журналистика факуль­тетіне оқуға түске­німізде ұстазымыз, Кеңес Одағы­ның Ба­тыры Мәлік Ғабдуллиннен дә­ріс алғанымыз бар. Кең-байтақ елі­міздің түкпір-түкпірінен жинал­ған қа­ра домалақтардың білімі мен ілі­міне көңілі толмаған академик ағамыз «Оу айналайындар-ау, ертең диплом алған соң журналист боласыңдар, ал бұл мамандық терең білім мен білік­тілікті қажет етеді, ендеше, уақыт­тарыңды бос жібермей, газет-журнал, кітап оқыңдар, ал кітап дегеніміз рухани азық, сананы сілкінтеді, білімді боласыңдар деуші еді. Сон­дықтар болар, сол кездегі студент­тер кітапханадан шықпайтын, жаңа шығармаларды іздеп жүріп оқитын. Ал қазіргі жастар ше? Бұл сауалды жақында Зайсан ауданындағы орталық кітапханада болғанымызда, мекеме  директоры Раиса Самархановаға қойған едік. – Қазір ересектер де, жастар да кітапханаға жиі келеді. Ауданның барлық елді мекендерінде, яғ­ни, сегіз ауылдық округте кітап­­­ханалар жұмыс істеп тұр. Аудан бойынша кітап қоры 105 мың дана, ал бізде 46700 кітап бар. Облыстық Пушкин атын­дағы кітапхананың директоры, «Құрмет» орденінің иегері Хабиба  Ақжігітова бізге үнемі қолғабыс жасап тұрады, 2012 жылдан бері сол кісінің қамқор­лығы нәтижесінде «Ир­бис» бағдарламасы  бойынша электронды каталогқа  кітап тізімі енгізілді, келіп кітап оқимын деген оқырмандар қажетті оқулықтар мен көркем шығармаларды тез тау­ып алып жатады. Біріккен Ұлттар Ұйымының «Даму» бағдарламасы бойынша экранды 3 бейнепроектор сатып әперді. Қазір мемлекеттік қызметкерлер және жоғары мектеп оқушылары тест тапсырамын десе, бізде білім сапасын тексере алады. Аудандық кітапханада және Қараталдағы кітапханада он-лайн кестесі бойынша қызмет көрсетуде. Бұл күндері тек Зайсан қаласы бойынша 4 300 ересектер, бір жарым мың оқушылар кітапхана қызметін пайдалануда, – деді кітапхана директоры. Кітапхананы араладық.  Сө­ре­лердегі кітаптар ұқыппен жи­налған, тазалық байқалады. Мұнда қазір 7 кітапханашы қызмет етеді. Жалақылары биылдан бастап 40 пайызға өскен. Бір бұрышта «Зайсан ауданының құрметті азаматы, Қазақстан Жазу­шылар одағының мүшесі Әубәкір Дас­тан­ұлы Нілібаев өзінің туған өлкесіне жеке кітап­тар қорын сыйға тартты» деген жазу көз тартады. Алматылық қаламгерлер Әу­бәкір ағамыздың кітап қоры­ның молдығы жайлы жыр қылып айтатынын  сан мәрте естігенбіз. Осыдан алты жыл бұрын қаламгер ағамыз Зайсанға келген сапарында ақыннан жеке кітапханаңызда қанша кітап бар деп сұрағанымызда, сақтық жасап, шынын айтпаған, Алматыда менен кітап қоры көп бір-екі адам ғана бар деп жымиған. Өзінің сексеннен асқан ғұмырында  байлық емес, кітап жинаған Әубәкір Дас­танұлы соңғы рет кіндік қаны тамған өлкесіне келгенде жеке кітап қорынан 400 кітапты сый­ға тартыпты. Кітап болғанда қандай, қолға түсе бермейтін шет­елдік классиктердің, атап айт­қанда, Фирдоуси, Науаи, Алек­сандр Блоктың сирек кез­десетін жырлары, Тагордың бір­неше томдары енді Зайсан ауданы тұрғындарының игілігіне арнал­ған. Қазақтың белгілі ақыны, Үндістанның Тагор атындағы халықаралық сыйлығының лауреа­ты Нілібаев ағамыздың өнегелі ісін басқалар жалғастырып жатса, қанеки, дейміз де. Ел Тәуелсіздігінің 25 жылдығы қарсаңында аудандық кітапхана тағы бір игілікті шараны қолға алыпты. Кітапхана қызметкерлері ауылдарды аралап, жерлес жазушылар шығармаларының көрмесін өткізе бастаған. Жа­қында Үлкен Қаратал ауылында Ұлы Отан соғы­сының ардагері, ұстаз Оразбай Тұрғанбайұлы атындағы саябақтың салтанатты ашылуында кітапхана директоры Раиса Самарханова жерлес ақын-жазушылардың кітап көрмесін ұйымдастырды. Адам­­дарға жан шуағын сыйлаған кі­тапхана қызметкерлерінің ісіне сәттілік тілейміз. Оңдасын ЕЛУБАЙ, журналист Шығыс Қазақстан облысы, Зайсан ауданы Суретті түсірген автор