Әкімдікке зәру шаруасымен бір азамат бас сұғады. Денсаулығы тастай, тепсе темір үзетін жігіт болса бір сәрі, белі бүкірейген кейуана, қарға адым жер жүруі қиын мүмкіндігі шектеулі жан да шаруамен келеді. Бастыққа кіріп, қағазына қол қойғызуға рұқсат алу үшін сағаттап кезек күтеді.
Одан керегін алған соң, тағы бір-екі мекемені адақтайды. Әупірімдеп жүріп бір шаруасының ұшығына жету үшін бір апта уақытын жұмсайды. Ал осы апталық шаруаны бірер сағатта ешкімнің есігін қақпай-ақ шешіп тастауға болады. Шымкентте ашылған «Front office» мемлекеттік қызмет көрсету орталығы осы мақсатқа арналған.
Т.Рысқұлов көшесінің бойында орналасқан «Фронт кеңсенің» ашылу салтанатына облыс әкімі Жансейіт Түймебаев пен облыстық, қалалық мәслихаттардың депутаттары қатысты. Қала әкімі Ғабидулла Әбдірахымовтың ұйытқы болуымен ашылған қалалық әкімдік қызметінің барлық түрі «Бір терезе» қағидатымен жүргізіледі.
– Бұл жақсы бастама, – деді облыс басшысы. – Енді орталықтың жұмысын халыққа насихаттап, кеңінен таныстыруымыз керек. Сонымен бірге, облыстағы барлық аудан, қала әкімдіктерінің мамандары осында келіп үйреніп, тәжірибе алмасқаны дұрыс. Осылайша, толықтай ашықтықта жұмыс істеп, халыққа қызмет жасауымыз керек.
Қала әкімдігі өз кезегінде қызмет көрсету жобасының смартфондарға арналған қосымшасы дайындалып жатқандығын айтты. Мұндағы жаңашылдық – өтініш иесінің құжаттары қабылданғанда оған арнайы бақылау коды беріледі. Тіркеуге алынған өтініш штрих-код арқылы арнаулы мекемелерге жіберіліп, жауабы өтініш иесіне жолданады. Ал жұмысының қаншалықты атқарылып жатқандығын білгісі келген тұрғын бақылау коды арқылы салдарын анықтай алмақ.
Қазіргі уақыт босбелбеулікті көтермейді. Өркениетті елдер әлдеқашан өтіп қойған орталық қызметінен тұрғындардың ұтары көп. Біріншіден, сен салар да мен салар қағазбастылықтан құтылады. Кеңсеге кірген адам бұрын өтінішін қанағаттандыру үшін лауазым иесіне сыйлық беруге тырысатын. Ал бұл – сыбайлас жемқорлыққа апаратын жағдай. Енді оған да жол берілмейді.
Жаңа жоба 400-ден астам мемлекеттік қызмет түрін көрсетеді деп күтілуде.
Бақтияр ТАЙЖАН,
«Егемен Қазақстан»
Оңтүстік Қазақстан облысы