Қазақты танытатын кітаптар

әлемнің сегіз еліне қойылды Құндылық туралы көз­қарас­тар әр кезеңде әртүр­лі сипатқа ие болып оты­­ратыны бар. Алысқа бар­май-ақ, 90-жылдардың басындағы жағдайды еске түсірейік. Ауылдағы кітап­ханалар жабылып, ескі кітаптар өртелген, өрт­тен аман қалғандарын қы­зы­ғу­шы­лық таныт­қан­дарға шү­лен үлестіргендей ғып та­рат­қан бір науқан өткен еді. Еліміз бойынша қанша кітап­хана жабылғанын тап басып қазір айтып бере алмаймыз, сондай-ақ, қанша кітаптың жоқ болғанын да санау мүмкін емес. Есесіне сол тұстардағы осы бір ол­қы­лықтың орны жаңаша бір жақ­сылықтармен, жаңа­лық­тармен толығу үстінде. Біздің өміріміздегі әдебиеттің орнын, кітаптың орнын ешқандай да қара күш басып ала алмайтынын сондайда бір түйсінесің. «Алтынды тот баспайтыны», «алмас қылыштың қын түбін­де жатпайтыны» сияқты кез келген құндылықтың өз дең­гейінде әспеттелетін межелі уақыттың болатынын өмір өзі дәлелдеп келеді. Өткен жыл да жақсы кітаптардың, құн­ды кітаптардың және маңыз­ды кітаптардың адымы ұзаруы­мен, оқылу жағрапиясы кеңеюі­мен есте қалды. Кітап ар­қы­лы елімізді, халқымызды таныту­дың мүмкіндіктері туды. Еліміз тәуелсіздігінің ширек ғасырлық мерекесіне тарту ретінде әлем­нің сегіз елінің Ұлттық кітап­хана­ларында «Қазақ әдебиетінің орталығы» ашылды. Қазақ халқы туралы, оның әде­биеті мен мәдениетінен, салт-дәстүрінен хабардар ететін бұл маңызды жобаның авторы – Астанадағы Ұлттық академиялық кітапхана. Корея, Қырғыз­стан, Мажарстан, Түркия, Ресей, Финляндия, Армения, Қытай ел­дерінің кез келген білім қуған жастары еліміздің тарихымен, әдебиетімен, өнерімен және осы уақытқа дейін жеткен жетіс­тіктерімен танысты. Мұн­дай ақпараттармен интернетте таны­судың жөні бір бөлек те, кітап­ты ұстап көріп, оны қызы­ғу­шылықпен оқып танысудың жөні бір бөлек қой. Жоғарыда аталған елдердің маңдайалды кітапханаларын­дағы «Қазақ әдебиетінің орталығы­на» Қазақстан Республикасы­ның Президенті Н.Назарбаевтың «Қазақстандық жол», «Тарих толқынында», «G-Global – ХХІ ғасырдың әлемі» атты кітаптары, қазақ халқының мәдени мұрасы болып табылатын «Қазақтың дәстүрлі 1000 күйі», «Қазақ халқының өлеңдері», «Қазақтың батырлық эпостары» жазылған CD-дискілер, басқа да бірқатар әдеби кітаптар қойылды. «Қазақ әдебиетінің орта­лығы» ең алдымен, Сеул қала­сындағы Ұлттық кітапханада ашылған болса, Қырғызстан­дағы орталық ТМД елдерінің ғылыми және шығармашылық интеллигенциясының ХІ фору­мы аясында Бішкек қаласында ашыл­ды, – дейді Ұлттық акаде­миялық кітапхананың басшы­сы, педагогика ғылым­дарының докторы Үмітхан Мұңалбаева. Дәл осы Бішкек қаласындағы Ұлттық кітапханада ашылған «Қазақ әдебиетінің орталығында» Ү.Мұңалбаеваның «Кітапхана педагогикасы» кітабының тұсауы кесілген. ТМД-ның 25 жыл­дығы, Қазақстан Республика­сы Тәуелсіздігінің 25 жылдығы, ТМД елдеріндегі білім мерекелері тұсында Қазақстан мен Ресей­дің мәдени қарым-қатынасы және достығының нығая түсуі үшін Ресей Мемлекеттік кітап­хана­сында ашылған «Қазақ әде­биетінің орталығы» да еліміз үшін маңызды бір оқиға. Жалпы, Мажарстанда, Финляндияда, Түр­кияда, Армения мен Қытайда ашылған орталықтар да Қазақ­стан атты іргелі елдің бар екені­нен, оның әдебиеті мен мәде­ниетінен, салт-дәстүрінен хабар беріп, қызығушыларды өзіне тарта түсері сөзсіз. Айгүл СЕЙІЛОВА, «Егемен Қазақстан»