«Нұр Отан» партиясы Алматы қалалық бөлімшесінде «Б» корпусының мемлекеттік әкімшілік қызметшілерін аттестаттау жөнінде әңгіме өткізілді. Бұл шараға байланысты кездесуде Мемлекеттік қызмет істері және сыбайлас жемқорлыққа қарсы іс-қимыл агенттігінің департамент бастығы Айгүл Байханова партия белсенділерімен 2017 жылдың 1 жарты жылдығында өтетін іс-шараның барысы жөнінде әңгімелесті.
Аттестаттаудың мақсаты «Б» корпусына кіретін қызметкерлердің кәсіби дайындығының деңгейін және атқарып отырған лауазымдарына сәйкестігін анықтау болып табылады. Онда мемлекеттік қызметшілердің кәсіби деңгейі, олардың қажетті білім дәрежесі мен дағдыларын иеленуі төрт кезеңде анықталатыны белгілі болып отыр.
Аттестаттау комиссиясының құрамына «А» корпусының мемлекеттік қызметшілері, әдеп жөніндегі уәкілдер, алдыңғы деңгейде сәтті өткен қызметшілер, әдеп кеңесінің мүшелері, ғылыми-сараптамалық және қоғамдық бірлестіктердің өкілдері кіреді. Бұл шара «100 нақты қадам» Ұлт жоспарында айтылған басымдықтарға байланысты жүзеге асырылмақ.
Сапарбай ПАРМАНҚҰЛОВ,
«Егемен Қазақстан»
АЛМАТЫ