Павлодар облыстық дене тәрбиесі және спорт басқармасының хабарлауынша, Алматыда өтетін 28-ші Бүкіләлемдік қысқы Универсиаданың алауы біздің өңірде қаңтардың 26-сы күні сағат 10-да Сұлтанмахмұт Торайғыров атындағы мемлекеттік университетте жағылады. Ал, алауды алып жүретіндердің құрамында Рио олимпиадасының қатысушысы Дәулет Шабанбай, Роман Валеев, паралимпиадашы Александр Медведев, шаңғы жарысынан 2016 жылғы 6-қысқы республикалық универсиаданың жеңімпазы Зура Қалипенова, әлем чемпионатының күміс медаль иегері Әлия Төлегенова, жеңіл атлет Роксана Оспанова және спорт ардагерлері Амангелді Аймағамбетов, Оразалы Мұхамедалинов, конькиші Людмила Прокашева, шахматшы Виктор Колеев секілді спортшыларымыз бар. Биыл павлодарлық биатлоншы қыз Арина Пантова Жасөспірімдер Олимпиада ойындарында қола медаль жеңіп алды.
Алау жағу рәсімі өткен соң спортшылар тобы облыс орталығындағы Ломов, Сәтбаев көшелері арқылы жүріп өтіп, Ертіс өзенінің төменгі жағалауына барады. Жағалау бойымен жүріп өтіп, Естай атындағы мәдениет сарайына келеді. Сарайда қысқы Универсиада ойындарының құрметіне мерекелік концерт өтеді. Алау көтерген спортшылар тобы келесі кезекте «Астана» мұз сарайына келіп, Универсиаданың гала-концертіне қатысады. Шара соңында жағылған Алауды шыны сауытқа орнатып, Алматыға қарай аттанады. Бұл күнгі спорттық шараға облыс орталығындағы оқу орындарының Екібастұз инженерлік-техникалық институтының, Ақсудың Жаяу Мұса атындағы колледжінің студенттері де қатысып, қолдау көрсетеді.
Фарида Бықай,
«Егемен Қазақстан»
ПАВЛОДАР