Елордада өткен алқалы жиында қоғам белсенділері мен белгілі заңгер-құқық қорғаушылар, зерттеу ұйымдары мен мемлекеттік құрылымдардың өкілдері бас қосқан жиында азаматтарды тіркеудің жайы талқыланды. Жиынға Ақпарат және коммуникациялар министрі Дәурен Абаев қатысып, БАҚ өкілдерінің сауалдарына жауап бере келе, жақын күндері азаматтарды тіркеудің онлайн жүйесі іске қосылатындығын мәлімдеді.
«Қазақстанда азаматтарды есепке алу жүйесін жаңғырту тетігі мен тіркеу жағдайы» тақырыбымен «PaperLab» пікірсайыс клубы ұйымдастырған жиында сөз алған Дәурен Әскербекұлы алдымен Алматы қаласында Халыққа қызмет көрсету орталығында қаза тапқан адамның туған-туыстарына көңіл айтты.
«Әрине, біз уақытша тіркеу шаралары іске аса бастағанда халыққа қызмет көрсету орталықтарында мұншалықты қалың бұқара жиналып, қарбалас жағдай қалыптасады деп күтпедік. Осы орайда, кейбір тетіктердің тиісті дәрежеде ұйымдастырылмағанын министрлік тарапынан мойындауымыз керек. Десек те, қазір жағдайды мұқият бақылап отырмыз. Алғашқы кездермен салыстырғанда халықтың ХҚО-ға жиналуы төмендеп, тіркеу үдерістері қалыпқа түсуде. Бүгінге дейін республика бойынша 250 мыңнан астам азамат тіркеуге тұрып үлгерді. Сонымен қатар, оқыс жағдайлардың қайталанбауы үшін біз өз құзыретіміздің шеңберінде тиісті ведомстволарға қажетті шара қолданылуын сұрап ресми хат жолдадық. Нәтижесінде, жұрт көп жиылатын орталықтарда дәрігерлік кезекшілік пен тәртіп сақшыларының қызметі сынды қосымша қызметтер ұйымдастырылды», деді министр Д.Абаев.
Сондай-ақ, министрдің БАҚ өкілдері мен қоғам белсенділерінің сауалына жауап беру барысында жақын күндері елімізде онлайн-тіркеу жүйесі іске қосылатындығы мәлім болды. Оның сөзінше, Ақпарат және коммуникациялар министрлігі тарапынан орындалуы тиіс барлық шаралар тиісті межесіне жеткен. Енді тек Ішкі істер министрлігінің құзырындағы екі-үш қызметтің үйлестірілуі ғана қалған көрінеді.
«Нақтылай түскім келетін бір мәселе, жақын күндері біздің ведомствоның мұрындық болуымен азаматтарды онлайн-тіркеу тетігі толығымен іске қосылады. Онлайн-тіркеу жобасы дайын, тек ІІМ тарапынан кейбір қызметтерді жетілдіру ғана қалып отыр. Бәлкім, келер аптада ел азаматтары қызметтің осы тетігін қажетіне жаратып қалатын шығар деп жоспарлап отырмыз», деді Д.Абаев.
Айта кетейік, басқосуға білікті заңгерлермен қатар, адвокат Д.Утебеков, «Қазақстан халықаралық адам құқы жөніндегі бюро» өкілі Е.Жовтис, «Қазақстандағы парламентаризмді дамыту қоры» ұйымының жетекшісі З.Батталова сынды қоғам белсенділері қатысып, мемлекеттік органдар өкілдерімен ашық пікір алмасты. Сондай-ақ, уақытша тіркеу мәселесіне қатысты олқылықтың орнын толтырып, жағдайды түзеудің жай-күйін жан-жақты талқылады.
Нұрлыбек ДОСЫБАЙ,
«Егемен Қазақстан»