Мәжіліс депутаты, Қазақстан халқы Ассамблеясы депутаттық тобының жетекшісі Сауытбек Абдрахманов Қармақшы, Жалағаш, Сырдария, Шиелі, Жаңақорған аудандарында болды.
Қармақшыда аудандық емханадағы негізгі әңгіме арқауы әлеуметтік саладағы өзгерістер, міндетті медициналық сақтандырудың жай-күйі жайында қозғалса, аудандық әкімдіктің мәжіліс залындағы кездесу кең ауқымды қамтыды. Жалағаш ауданының орталығындағы амбулаториялық емхана қызметкерлері кездесу кезінде денсаулық сақтау саласына жасалып отырған қамқорлыққа ризашылықтарын білдірді.
Сырдария ауданында С.Абдрахманов Шаған ауылындағы жаңа балабақшаның ашылуына қатынасып, құттықтау сөз сөйледі. Шиелідегі құбыр зауытының, Жалағаштағы күріш ақтау элеваторының жұмысымен, Шиелі ауданындағы Ыбырай Жақаев, Нартай Бекежанов музейлерімен танысу да қызғылықты өтті.
Қорқыт Ата атындағы Қызылорда мемлекеттік университетінде оқытушы-профессорлар құрамымен, студенттермен емен-жарқын кездесуде университет ұстаздары өздерін толғандырып жүрген бірқатар мәселелер бойынша жан-жақты ақпаратқа қанықты.
Ержан БАЙТІЛЕС,
«Егемен Қазақстан»
Қызылорда облысы