Астанадағы «Алау» коньки тебу стадионын ТМД елдерінде теңдесі жоқ, дүниежүзі бойынша саусақпен санарлықтай салынған спорт кешендерінің бірі деуге болады.
Өйткені, ол алдыңғы қатарлы технологияларды пайдалану арқылы бойына түрлі функциялық элементтерді біріктіре алған алып кешен болып саналады.
Спорт сарайының іргетасы 2007 жылғы қараша айында қаланған болатын. Оның сәулетшілері А.Лаптев пен А.Позников болса, жобаның бас мердігері түркиялық «Sembol иншаат» компаниясы. Осы компания кешеннің құрылысын сол кезден бастап, Қысқы Азиада қарсаңында бітірді.
Қазір кешенді ғимарат ортада орналасқан мұз айдынынан және оған біріктіріле салынған қосымша үш ғимараттан: қонақ үй, фитнес орталық және әкімшілік бөлімнен тұрады.
Жалпы, мұз айдынында өтетін шараларды бір кезде 7 620 көрермен көріп, қонақ үйде 100-ге жуық адам орналаса алады. Ал фитнес орталықта түрлі бағыттағы тренажерлар, йога мен пилатесса бөлмесі, баскетбол мен гандбол ойнауға арналған залдар, массаж, spa-салон, шаштараз, имитациялық кабинет тағысын тағылар бар. Кешенде мейрамхана, кафе-барлар да жоқ емес. Онда сайыс кезінде бір кезде 400-ге шамалас адам тамақтана алады.
Сондай-ақ, спорт сарайы әкімшілік кеңселерден, төреші алқасы залынан, баспасөз мәслихатын және басқа да түрлі мәжілістер өткізетін 103 орындық конгресс залдан, спортшылардың киім ауыстыруына арналған 160 орындық бөлмелерден тұрады.
«Алау» коньки тебу стадионының директоры Дархан Досмағамбетовтың айтуынша, оның жүрегі – 9500 шаршы метрлік мұз айдыны болып есептеледі. Ондағы жарыс жолы әлемдік талаптарға сай жасалып, ұзындығы 400 метрді құрайды. Екі жол жарыс үшін, ал көгілдір түске боялған үшінші жол жаттығуға арналған. Сонымен бірге мұз құю үшін төрт сатылы кезеңнен өткізілген тазартылған мөлдір су пайдаланылады. Кешегі өткен Қысқы Азидаға қатысқан спортшылар, тәуелсіз сарапшы мамандардың бағалауынша, спорт кешенінің салынуы мен ондағы мұздың деңгейі өте жоғары. Тіпті, бірқатары «Алаудың» айдынын әлемдік жабық мұз айдыны стадиондарымен тайталаса алады деген пікірлерін білдіріп кетті.
Спорт сарайының құрал-жабдықтарының бәрі соңғы технологиялармен жабдықталған. Мұнда су дайындау бойынша көптеген жылғы тәжірибесі бар «Ewrowater» компаниясының құрылғылары орнатылған. Ол біздегі судың сапасын ескере отырып, төрт сатылы тазартудан өткізеді. Сонымен бірге стадион байланыс жүйесі және ақпаратты тарату бойынша жақсы технологиялармен қамтамасыз етілген. Соның ішінде секөнтіне 20 000 түсірілім жасайтын мәре құрылғысы бар. Ал мұз айдынының төрт бұрышындағы бейнекамера 360 градусқа айналып, сандық үлгіде өте сапалы түсіре алады. Мұндай сапалы бейнекамера стадионның конгресс-залында да орналасқан.
Ал енді спорт кешенінде халықтың спортпен айналысуына қандай мүмкіндіктер бар десек, спорт сарайы конькимен сырғанау, шорт-трек, лонг-трек, канадалық хоккей, керлинг және мәнерлеп сырғанау сияқты спорт түрлерінен жарыс өткізуге арналғандықтан мұнда Азия ойындарынан кейін №2 балалар және жасөспірімдер спорт мектебімен бірлесіп, мәнерлеп сырғанау және коньки тебуден 5 пен 18 жастағы балалар мен жасөспірімдерге арналған үйірмелер жұмыс істеуде. Мәнерлеп сырғанау бойынша аптаның алты күні сағат 10.00-нан 17.45-ке дейін, коньки тебуден аптаның бес күні сағат 10.30-дан 18.30-ға дейін жас ерекшелігіне және әртүрлі деңгейде меңгеруіне байланысты үйірмелер жұмыс істейді. Олардың бәрі тегін. Алдағы уақытта шорт-трек пен хоккей бойынша да үйірмелердің жұмыс жасауы қарастырылуда. Сонымен бірге қарапайым халықтың коньки тебуі үшін конькидің жалға беру жағы да ойластырылып жатқан көрінеді. Сол сияқты фитнес орталықтағы тренажер залдарында кез-келген азамат арнайы жаттықтырушымен дене шынықтыра алады. Одан басқа әртүрлі би үйірмелері қызмет етіп, йога, каратэ, у-шу сияқты спорт түрлерімен айналысуға да болады.
Жалпы, «Алау» спорт сарайының кәсіпқой спортшыларға да, саламатты өмір салтын ұстанушы азаматтардың бәріне де есігі ашық.