Талантты ұрпақты тап басып танып, бойындағы қарымы мен дарынын ашу арқылы ондаған жастың келешегіне керек кемел жол сілтеуге болады. Ол негізінен «Ғылым әлемін ашамыз» деген тақырыппен өтуде.
Осы шара кеше елордадағы «Назарбаев университетінің» сенат залында болды. Конференцияға келген талантты жастар ғарыштық технологиялар, астрофизика және модельдеу, ғарыш және жер туралы өздерінің байлам-пайымдарын сарапшылар талқысына ұсынуда.
Конференцияның ашылу рәсіміне Білім және ғылым министрі Бақытжан Жұмағұлов қатысып, жас таланттарға сәт сапар тіледі. Бұл білім сайысының «Назарбаев университетінде» өтуінің өзінде символдық мән бар екенін тілге тиек етті.
Біз «Ғылым әлемін ашамыз» деген тақырыптағы оқушылардың VII халықаралық конференциясына ұйытқы болған «Дарын» орталығының директоры Т.Битуоваға жолыққанымызда, ол бұл шараның екі күн бойы өтетінін, онда екі жүзге тарта жастардың өздері әзірлеген ғылыми тақырыптары бойынша бақ сынайтынын, әсіресе, «Ғарыштық техника және инфрақұрылым», «Ғарыштық-ақпараттық технологиялар және үлгілендіру», «Ғарыштық қызмет және экология», «Астрофизика және ғаламдық эволюция», «Күн жүйесі» деген бес тақырып бойынша жеңімпаздар анықталатынын атап өтті.
Сүлеймен МӘМЕТ.