Астанада оралман жас суретшілердің «Отаным – алтын бесігім» атты шығармашылық көрмесі ашылды. Көрмеге қатысушылар – ата жұртына оралған жас талант иелері Жүсіпбек Дәлелхан, Қайрат Жәйірбекұлы (Қытай халық республикасынан), Аманжол Мұсалимов (Ресей) және Руслан Жүсіналиев (Қырғызстан).
Бәрімізге белгілі, ата-бабамыз ғасырлар бойы армандаған азаттық таңы атқалы іргелес елдерден 1 миллионға жуық қазақ туған жерге табан тіресе, солардың арасында әртүрлі мамандықтардың құлағын ұстаған азаматтар да аз емес. Соның бірі – қылқалам ұстаған суретшілер қауымы десек, бүгінгі таңда олардың бірқатары, елорданың мәдени-шығармашылық өміріне өз үлестерін қосуда.
Көрмені ашқан ҚР Суретшілер одағының мүшесі Қоңыр Мұхаммедиев:
– Бүгінгі көрмемізде өскен орталарында қазақы рухты жоғалтпай, шынайы мәдениетімізді сақтап, бүгінгі жаңарған Қазақстанға жеткізген бауырларымыздың шығармашылық туындыларының куәгері болып отырмыз. Осындай жақсы істер жалғасын таба беретініне сенемін. Ата жұртына табан тіреген жас таланттарымыздың туған жеріне берері көп, – деді.
Көрмеге арнайы келген белгілі қоғам қайраткері, ҚР «Көші-қон» заңының авторы Әкім Ысқақ жастарға жылы лебізін білдіріп, кітаптарына қолтаңбасын қойып, сыйға тартты.
Көрмеге қойылған жас өнерпаздардың туындыларында бейнеленген қазақ өмірінен, жаңа Астанамыздың көріністерінен оралман бауырларымыздың туған жерге деген үкілі сағынышын көреміз.
Е.ЕРҒАЛИҰЛЫ.
Астана.