Кеше Үкіметте «Ұлт саулығы – мемлекет бәсекелестігінің кепілі» тақырыбында баспасөз мәслихаты өтті. Жиынға Денсаулық сақтау министрі Елжан Біртанов, Медициналық және фармацевтикалық қызметті бақылау комитеті төрағасының орынбасары Лариса Пак, «Әлеуметтік медициналық сақтандыру қоры» коммерциялық емес акционерлік қоғамының төрайымы Елена Бахмутова, Республикалық электронды денсаулық сақтау орталығының бас директоры Олжас Әбішев қатысты.
Денсаулық сақтау министрі Елжан Біртанов өз сөзінде Елбасының «Қазақстанның Үшінші жаңғыруы: жаһандық бәсекеге қабілеттілік» атты халыққа Жолдауында денсаулық сақтау жүйесінің алдына міндетті әлеуметтік медициналық сақтандыруды (МӘМС) енгізу, жеке медициналық ұйымдарға сақтандыру жүйесінде тең жағдай жасау, денсаулық сақтау саласын тиісті деңгейде ақпараттандыру, барлық дәрі-дәрмектерге бағаны мемлекеттік деңгейде реттеу туралы нақты тапсырма бергенін атап өтті.
«Биыл ақпан айында медициналық қауымдастық, жұмыс берушілер мен халықтың арасында міндетті әлеуметтік медициналық сақтандыру жүйесіне байланысты ақпараттық-түсіндіру жұмыстарының үшінші кезеңі басталды. Бұл шараны жүргізу үшін әрбір облыста, Алматы, Астана қалаларында әкімдер мен олардың орынбасарларының басшылығымен аймақтық штабтар жұмыс істеуде. Ақпараттық-түсіндіру жұмыстарына Республикалық штаб құрамының белгілі дәрігерлері, қоғам қайраткерлері, медициналық оқу орындарының оқытушылары, құрылымдық бөлімдердің басшылары шақырылды. Жалпы алғанда, МӘМС-ті енгізу қазақстандықтардың денсаулығын жақсартуға, өмір сүру ұзақтығын арттыруға, сапалы медициналық көмекті қолжетімді және халықтың сұранысына сай етуге, амбулаторлық деңгейде дәрімен қамтамасыз етудің аясын кеңейтуге, денсаулық сақтау жүйесіндегі бейресми төлемдер көлемін азайтуға мүмкіндік береді», деді министр.
Денсаулық сақтау министрлігі мен Дүниежүзілік банк сарапшылары 57 елдің тәжірибесі ескерілген заң жобасын 3 жыл көлемінде дайындап, тиімді модель ұсынғандарын айтып өткен болатынбыз. Ал аталмыш медициналық сақтандыру қорына төлем жасау жөнінен халықтың әлі де көп бөлігі хабарсыз. Осы төңірегінде «Әлеуметтік медициналық сақтандыру қоры» АҚ төрағасы Елена Бахмутова медициналық сақтандыру қорына төлем жасаушылардың жылдық қаражатын тілге тиек етті. «Жалпы алғанда, жұмыс беруші жылына бір қызметкерге 30 550 теңге төлесе, қызметкердің өзі 20 470 теңге көлемінде, жеке кәсіпкер 35 560 теңге және жұмыссыз топ 17 818 теңге, ал мемлекет зейнеткерлер мен мүгедектерге, өзге де әлеуметтік жеңілдігі бар жандар үшін 71 160 теңге төлейтін болады», деді ол.
Жиынға қатысушылар кезең-кезеңмен пациенттердің медициналық қызметкерлерге өздігінен онлайн жазылу, онлайн тәртіпте электронды денсаулық паспортында жинақталған технологиясының көмегімен пациенттерге кеңес беру мен оларды бақылау енгізілетінін алға тартты.
Рауан ҚАЙДАР,
«Егемен Қазақстан»