Білім және ғылым министрлігінде барлық аймақтармен тікелей байланыста, бейне конференция режімінде Балалар үйлері жанындағы бірыңғай республикалық қамқоршылар кеңесінің отырысы өтті.
Балалар үйлерінде тәрбиеленуші балалардың өмірін жақсарту, олардың құқықтарының бұзылуына жол бермеу, сондай-ақ балаларды Қазақстан азаматтарының отбасыларына беріп, ата-ананың жылылығы мен мейірімін көріп өсетін отбасыға қайтару бойынша жұмыстарды жетілдіруді басты назарында ұстайтын Кеңес отырысында Білім және ғылым вице-министрі Бибігүл Асылова: «Бүгіннен бастап жетім балаларға арналған білім беру мекемелері жанындағы қамқоршылық кеңестері өз жұмысын бастады деуге болады. Кеңестер құрамына үкіметтік емес ұйымдар, мемлекеттік органдар, саяси партиялар, бизнес өкілдері, демеушілер мен меценаттар енді» дей келе, балалардың отбасында тәрбиелену құқығын жүзеге асыру үшін жұмыстардың белсенді түрде жүргізілуіне мән беру керектігін баса айтқан. Бұл ретте, қамқоршылар кеңесі уәкілетті органдармен бірлесе отырып, бала қабылдайтын отбасыларды дайындау бойынша талаптарды, сондай-ақ балаларды балалар үйінен қабылдайтын отбасыға беруді дайындаудың тиімді тәсілдерін жетілдіруде ізденістерге қолдау көрсету бойынша көптеген ойды ортаға салды.
Жиында айтылғандай бүгінгі таңда баланы өз отбасында тәрбиелеуге алғысы келетін отбасылар үшін, ата-ана қамқорлығынсыз қалған балалар мен жетім балалардың республикалық мәліметтер базасы құрылып, балаларды отбасына оралтуда заңнамамен орналастырудың жаңа түрлері анықталған екен. Ол – бала қабылдайтын отбасы, бала қонақтайтын отбасы (каникул кезеңдерінде, демалыс және мереке күндері балаларды уақытша орналастыру түрі) сынды заңнамалық тұрғыда белгіленген тәртіптер. Айта кету керек, елімізде ата-ана қамқорлығынсыз қалған балалар саны жылдан-жылға азаюда, өткен жылы балалар мен жетім балаларға арналған ұйымдарда 8066 бала тәрбиеленсе, 2017 жылдың 1 қаңтарында олардың саны 7236 болып, балалар санының азаюына байланысты арнайы мекемелер желісі де қысқарған. Яғни жетім балаларға арналған ұйымдар жүйесі 48 бірлікке азайған көрінеді (188-ден 140-қа дейін).
Отырыс басталмас бұрын журналистер сауалына жауап берген министрдің балалар құқықтарын қорғау бойынша кеңесшісі Бәлия Әкімбекова қамқоршылық кеңес мүшелерінің 40 пайызын үкіметтік емес ұйымдар кұрауы қажеттігін, Кеңестің төрағасы да үкіметтік емес ұйымның өкілі болғаны жөн екенін айтқан. «Қазіргі уақытта Білім және ғылым министрлігі қамқоршылық кеңестерін құру бойынша тиісті ережелерді әзірлеп қойды. Жақын арада аталған ережелерді бекіту жоспарланып отыр. Жалпы, заңнамада білім беру мекемелері жанынан қамқоршылық кеңестерін құру нормасы бар» деген ол кеңес жұмысының жалпы қоғамға ашық болатынын, ақпараттардың жариялылығы қамтамасыз етілетінін жеткізген.
Кеңес құрамына қоғамдық ұйымдардың өкілдері, балалардың құқықтарын қорғау қоры, қабылдаушы ата-аналар ассоциациясы, басқару органдары (оның ішінде құқық қорғау органдары), партия және «Атамекен» ҰКП мүшелері еніп, бірыңғай республикалық қамқоршылар кеңесінің келесі отырысы енді 6 айдан соң өткізіліп, отырыста кеңестің сол уақыт аралығында атқарған жұмысының қорытындысы тыңдалып, барлық бұқаралық ақпарат құралдары мен БҒМ және Балалардың құқықтарын қорғау комитетінің сайтында, интернет-ресурстарда жарияланады деп шешілді.
Анар ТӨЛЕУХАНҚЫЗЫ,
«Егемен Қазақстан»