Кеңес барысында әлемдік инновациялық көшбасшы компаниялармен бірлескен ынтымақтастық орнату мәселелері, сонымен қатар, Премьер-Министр Б.Сағынтаевтың АҚШ-қа жұмыс сапары кезінде қол жеткізілген уағдаластықтар қаралды. Б.Сағынтаев кеңес қорытындысы бойынша жауапты мемлекеттік органдарға бірқатар нақты тапсырмалар берді.
Жаңа жолаушылар терминалының құрылысымен танысты
Халықаралық ЭКСПО-2017 көрмесі қарсаңында Премьер-Министр Б.Сағынтаев Астана әуежайын аралап, жаңа жолаушылар терминалдарының құрылысы барысымен танысты, сондай-ақ, әуежайдың қолданыстағы терминалдың жұмысы туралы баяндаманы тыңдады, деп хабарлады Премьер-Министрдің баспасөз қызметі.
Астана әуежайының жолаушылар терминалын жөндеу «Нұрлы жол» бағдарламасын орындау аясында 2015 жылдың қаңтарынан бастап жүргізіліп жатыр. Жобада жалпы ауданы 47 000 ш.м. болатын терминал салу қарастырылған, оны аяқтаған соң әуежайдың өткізу қабілеті жылына 8,2 млн-нан астам жолаушыны құрайды.
1 маусымға қарай жаңа терминал бірінші рейстің жолаушыларын қабылдауға дайын болады деп күтілуде.
Цифрлы технологиялар дамытылмақ
Премьер-Министр Бақытжан Сағынтаев Президент Н.Назарбаевтың Астана қаласының әлеуметтік-экономикалық дамуы мәселелері және халықаралық ЭКСПО-2017 мамандандырылған көрмесіне дайындық барысы бойынша тапсырмаларды іске асыру жөнінде кеңес өткізді, деп хабарлады Премьер-Министрдің баспасөз қызметі.
Кеңес барысында, Мемлекет басшысы ЭКСПО-2017 аумағын аралау кезінде өз сөзінде айтып өткендей, Астана қаласын еліміздегі цифрлы технологияларды енгізуге арналған негізгі алаң ретінде дамыту мәселелері талқыланды. Осыған байланысты Премьер-Министр Б.Сағынтаев елорда әкімдігіне ғана емес, барлық мемлекеттік органдарға елорданың көлік инфрақұрылымын, тұрғын үй секторын, қала басқармасының барлық салаларында заманауи цифрлы технологияларды енгізуді ауқымды дамыту бойынша бірқатар тапсырмалар берді.