Қазақстан мен Қытайдың жетекші саяси партиялары арасындағы Ынтымақтастық туралы хаттамаға қол қою, партиялық кадрларды оқыту, жастармен жұмысты жетілдіру бойынша тәжірибе алмасу – «Нұр Отан» партиясы делегациясының Қытай Халық Республикасына жасаған жұмыс сапарының кейбір нәтижелері осындай.
Партия Төрағасының бірінші орынбасары Нұрлан Нығматулин бастаған «Нұр Отан» делегациясы жұмыс сапарының бағдарламасы мазмұнды болды. Сапар барысында нұротандықтар Қытай Коммунистік партиясы басшылығымен кездесулер өткізіп, ККП Жоғары партия мектебі мен партияның аймақтық филиалдарының жұмысымен танысты.
Қазақстан мен Қытайды бұрынғы уақыттан бері серіктестік және достық қатынастар байланыстырып келеді. Қазақстан Президенті Нұрсұлтан Назарбаев пен Қытай Төрағасы Ху Цзиньтао арасындағы жүйелі кездесулер берік экономикалық іргетаспен қаланған екіжақты қатынастардың одан әрі нығаюына мүмкіндік туғызып отыр. Қазақстан мен Қытай арасындағы жан-жақты әріптестікті кеңейтуге партияаралық байланыстар да зор үлес қосуда. Сондай-ақ қос мемлекеттің жетекші саяси партияларының өзара әрекеттесу тәжірибесі бай: бірлескен жобалар жүзеге асырылып, делегациялар алмасулар жүруде, халықаралық конференциялар мен «дөңгелек үстелдер» ұйымдастырылып келеді.
Нұрлан Нығматулин Қытайға жұмыс сапары барысында ККП басшылығымен кездесті, ККП Жоғары партия мектебін аралады. Бұл мектеп партиялық кадрларды даярлайтын әлемдегі мықты мектептердің бірі болып табылады. Мектептің бай тәжірибесі, салмақты материалдық-техникалық базасы, жоғары кәсіпті профессорлық-оқытушылық құрамы білікті кадрларды даярлауға мүмкіндік береді. «Нұр Отан» партиясы өз кадрларын оқыту мәселесіне баса назар аударады, сондықтан Қытай Жоғары партия мектебіндегі кездесулер нәтижесінде «Нұр Отанның» Жоғары партия мектебімен бірлескен жұмысы туралы келісімдер жасалды.
Қытайға сапары кезінде Нұрлан Нығматулин ҚХР-дың Телерадиохабар басты басқармасының жетекшісі Тянь Цзинмен Қытай КП Шанхай қалалық комитетінің хатшысы Юй Чженшенмен Қытай халықтық саяси консультативтік кеңесінің жалпықытайлық комитетінің төрағасы Цзя Цинлинмен, Қытай КП ОК-ның хатшысы, саяси бюро мүшесі Лю Юньшанмен кездесті.
– Бұндай кездесулерді өткізу екі жаққа да пайдалы болатыны сөзсіз деп ойлаймын. Олар Қазақстан-Қытай ынтымақтастығын және біздің достық көршілес қарым-қатынастарымызды нығайтады. Өткен жылы мен Астанаға барып қайттым және де Қазақстанның даму қарқынын өз көзіммен көрдім. Қазақстанмен қатынастарын Қытай әрдайым өзара келісім мен серіктестік негізінде құрып келеді. Бұл үрдіс одан әрі жалғасын табады, – деді өз сөзінде Лю Юньшан.
ҚХР-ға жұмыс сапарының қорытындыларына орай, партия Төрағасының бірінші орынбасары Нұрлан Нығматулин:
– Осы күндердегі Қытай Халық Республикасындағы көптеген кездесулер біздің Президентіміз, партиямыздың Төрағасы Нұрсұлтан Әбішұлы Назарбаевтың халықаралық беделі, әлемдік саясатта алатын орны аса жоғары екенін тағы да көрсетті. Елбасының басқаруымен мемлекетімізде іске асырылып жатқан барлық реформалар туралы Қытайда өте жақсы білетініне және оларды аса жоғары бағалайтынына куә болдық. Бұл «Нұр Отан» партиясы мен Қытай билеуші партиясы арасында партияаралық қатынастарды нығайтуға да үлкен мүмкіндіктер берді. Біздің әріптестігіміз тәжірибе алмасу, кадрларды дайындау, жастар саясатын жүргізу, тағы да басқа бағыттар бойынша жүргізілетін болады деген келісімге келдік, – деп атап өтті.