Жақында Л.Н.Гумилев атындағы Еуразия ұлттық университетіндегі академик Р.Нұрғали дәрісханасында «Тәуелсіздік мұраттарын қалыптастырудағы қазіргі қазақ драматургиясының эстетикалық-әлеуметтік функциясы» жобасы аясында «Р.Нұрғали мұрасы және қазіргі драматургиядағы тәуелсіздік мұраттары» атты ғылыми семинар өтті.
Сондай-ақ ғалымдар, ақын-жазушылар, режиссерлер, әртістер және студенттер қатысқан семинарда Р.Нұрғалидың қазақ драматургиясын зерделеудегі еңбегі, қазіргі драматургиядағы тәуелсіздік мұраттарының берілуі, замана шындығының бейнеленуі, қазақ және әлем драматургиясы дамуындағы сабақтастықтар сияқты келелі әңгімелер қозғалды. Мемлекеттік сыйлықтың лауреаты, жазушы-драматург Әкім Тарази драма жанрын зерттеудегі Рымғали Нұрғалидың үлкен еңбегі туралы айта келе, драматургияның қазіргі ахуалы, жастардың бұл жанрдағы жаңа ізденістері туралы ой қозғаса, Қ.Қуанышбаев атындағы театрдың директоры Е.Жуасбеков те академик ғалымның драманы зерделеудегі ұлан-ғайыр еңбегін қазіргі драматургияның дамуымен, театр ахуалымен байланыстыра өрбітті. Қазіргі драматургияның тәуелсіздік мұраттарын қалыптастырудағы рөлі туралы басқа да қаламгерлер жан-жақты айтып өтті.
«Егемен-ақпарат».