13 шілде күні халықаралық дәрежедегі спорт нұсқаушысы, альпинист Ербол Оразалин екі серігімен бірге 9-15 жас аралығындағы бір топ жасөспірімдерді ертіп Сайрам-Өгем ұлттық паркі арқылы серуенге шыққан.
Нұсқаушылар тәжірибелі, адамгершіліктері жоғары жігіттер. Балалардың ата-аналары ұландарының туған ел табиғатының ғажайыптарымен тыныстап, арқаланып қайтуына қарсы болмайды. Шынығып, ширап қайтсын деп ойлайды.
Он күннен кейін оралуға тиіс топ сол кеткеннен құмға сіңген судай жоқ болған. Сөйтсе 14 шілде күні Сайрам су кемпингі арқылы өзен бастауында тұрған Майданталға өтіп, кері бұрылмақ болған топты Өзбекстан шекарашылары ұстап, шекара бұзушылар деп рәсімдеп, Бостандық аудандық полиция бөліміне өткізген.
Шымкентке оралуға тиіс балаларын күткен ата-аналардың жан күйзелісін сөзбен жеткізу қиын. Тау саяхатымен айналысатын, туған жер табиғатын насихаттап жүретін белгілі журналист Кеңес Исмайылов бас болып, балаларға іздеу жариялаған. Әу баста күдік өзбек шекарашыларына түскенімен, жекелеген адамдардың араласуы арқылы балалардың Бостандық полиция бөлімінде қамалып отырғандығы белгілі болған.
Тауда арнайы тартылған шекара белдігі жоқ. Мына метр Қазақстандікі, мына жарты метр Өзбекстандікі дей алмайсың. Өзбек шекарашыларының әсіреқырағылық танытуы бұл бір емес. Сонау жылдары екі ел шекарасын белгілеу кезінде арнайы келген Парламент депутаттары мен алтын погонды генералдарымыздың көзінше соларды түсіріп жүріп, аңдаусызда өзбек шекарасына екі-үш қадам кіріп кеткен операторымызды олардың алып қашқанын көріп едік.
Қазақстанда 400 мыңға жуық өзбек диаспорасы тұрады. Бөтенсің деген ешкім жоқ. Жағдайлары өте жақсы. Проблемалары шешілген Қазақ оларға туысқаным деп қарайды.
Туысқандық екі жаққа бірдей болуы керек. Ең болмаса хабарлап айтпай ма? Әр нәрсенің талабына сай тәртібі де болады ғой. Шекарада әсіреәрекеттер жасайтын өзбек сақшыларының осыны ойламайтыны өкінішті.
Бақтияр ТАЙЖАН,
Оңтүстік Қазақстан облысы.